കൊവിഡ് 19 വാക്‌സിനേഷന്‍; ഗുരുവായൂരില്‍ ടാസ്‌ക് ഫോഴ്‌സ് രൂപീകരിച്ചു

ഗുരുവായൂര്‍: ജനുവരി 16ന് ആരംഭിക്കുന്ന കൊവിഡ് 19 വാക്‌സിനേഷന്‍ പ്രവര്‍ത്തനം ഏകോപിപ്പിക്കുന്നതിന് ഗുരുവായൂര്‍ നഗരസഭയില്‍ ടാസ്‌ക് ഫോഴ്‌സ് രൂപീകരിച്ചു. 16 മുതല്‍ പ്രവര്‍ത്തനം ആരംഭിക്കുന്ന ടാസ്‌ക് ഫോഴ്‌സ്‌ന്റെ ഉദ്ഘാടനം നഗരസഭ ചെയര്‍മാന്‍ എം കൃഷ്ണദാസ് നിര്‍വഹിച്ചു. ആദ്യഘട്ടത്തില്‍ ആരോഗ്യ പ്രവര്‍ത്തകര്‍ക്കും രണ്ടാം ഘട്ടത്തില്‍ പൊലീസ് ഫയര്‍ ഫോഴ്‌സ് സേനകള്‍, സിവില്‍ ഡിഫെന്‍സ് തുടങ്ങിയവര്‍ക്കും മൂന്നാം ഘട്ടത്തില്‍ 50 വയസ്സിന് മുകളിലുള്ള പൗരന്‍മാര്‍, 50 വയസ്സിന് താഴെയുള്ള ശാരീരിക പ്രതിരോധ ശേഷി കുറവുള്ള അവശതയനുഭവിക്കുന്നവര്‍ എന്നിവര്‍ക്കുമാണ് വാക്‌സിനേഷന്‍ നല്‍കുക.

നഗരസഭ കെ ദാമോദരന്‍ ഹാളില്‍ നടന്ന യോഗത്തില്‍ വൈസ് ചെയര്‍പേഴ്‌സണ്‍ എം പി അനീഷ്മ അധ്യക്ഷത വഹിച്ചു. ചടങ്ങില്‍ നഗരസഭ സെക്രട്ടറി എ എസ് ശ്രീകാന്ത്, കടപ്പുറം ഹെല്‍ത്ത് സൂപ്പര്‍വൈസര്‍ കെ കെ ഹുസൈന്‍, ഡോ. ജോസ് ടി ജേക്കബ്ബ്, ഗുരുവായൂര്‍ ദേവസ്വം, പോലീസ്, ആരോഗ്യം, റവന്യു, പട്ടികജാതി വികസനം തുടങ്ങിയ വിവിധ വകുപ്പ് മേധാവികളും പങ്കെടുത്തു.