പി ജയരാജന്റെ പേരില്‍ ഓണ്‍ലൈന്‍ തട്ടിപ്പ്; പോലിസ് കേസെടുത്തു

കണ്ണൂര്‍: ഖാദി ബോര്‍ഡ് വൈസ് ചെയര്‍മാനും സിപിഎം സംസ്ഥാന കമ്മിറ്റിയംഗവുമായ പി ജയരാജന്റെ പേരില്‍ ഓണ്‍ലൈനില്‍ പണം ആവശ്യപ്പെട്ട് തട്ടിപ്പ്. ജയരാജന്റെ ചിത്രം പ്രൊഫൈല്‍ ഫോട്ടോ ആക്കിയാണ് വാട്‌സ് ആപ്പ് വഴി സംഘം നിരവധി പേരോട് പണം ആവശ്യപ്പെട്ടത്. കൊയിലാണ്ടി സ്വദേശിയുടെ നമ്പര്‍ ഉപയോഗിച്ചാണ് തട്ടിപ്പിന് ശ്രമം നടന്നത്. വ്യാജ വാട്‌സ് ആപ്പ് പ്രൊഫൈലില്‍ നിന്ന് പലരോടും പണം ആവശ്യപ്പെട്ടു.

സന്ദേശം ലഭിച്ചവര്‍ സംഭവം ജയരാജന്റെ ശ്രദ്ധയില്‍പ്പെടുത്തുകയായിരുന്നു. സംഭവത്തില്‍ പി ജയരാജന്‍ അഡീഷനല്‍ കമ്മീഷണര്‍ പി പി സദാനന്ദന് പരാതി നല്‍കി. ജയരാജന്റെ പരാതിയില്‍ കണ്ണൂര്‍ ടൗണ്‍ പോലിസ് കേസെടുത്ത് അന്വേഷണം ആരംഭിച്ചു. പ്രതികളെക്കുറിച്ച് സൂചന ലഭിച്ചതായി പോലിസ് പറഞ്ഞു.