അമ്മമാര്‍ക്ക് ഓണസമ്മാനമൊരുക്കി പഴയന്നൂര്‍ ബ്ലോക്ക് പഞ്ചായത്ത്

പഴയന്നൂര്‍: പഴയന്നൂര്‍ ബ്ലോക്ക് പഞ്ചായത്ത് ഒരുക്കുന്ന 'അമ്മമാര്‍ക്ക് ഓരോണ സമ്മാനം' പദ്ധതിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്റ് വി. തങ്കമ്മ നിര്‍വ്വഹിച്ചു. ബ്ലോക്ക് പഞ്ചായത്ത് പകല്‍ വീട്ടിലെ അമ്മമാര്‍ക്കാണ് ഓണസമ്മാനപ്പൊതി വീടുകളില്‍ എത്തിച്ചു നല്‍കിയത്. കൊവിഡ് 19 സാഹചര്യത്തില്‍ പകല്‍ വീട്ടില്‍ അന്തേവാസികളായവരെല്ലാം സ്വന്തം വീടുകളില്‍ തന്നെയാണ്. 60 വയസ്സിന് മുകളിലുള്ളവരായതിനാല്‍ ഒത്തുചേരല്‍ വേണ്ടെന്നുവച്ചാണ് വീടുകളിലേക്ക് ഓണസമ്മാനം എത്തിച്ചു നല്‍കിയത്. ഉദ്ഘാടന ചടങ്ങില്‍ ബ്ലോക്ക് പഞ്ചായത്ത് വൈസ് പ്രസിഡന്റ് എം. പത്മകുമാര്‍ അദ്ധ്യക്ഷനായി. വനിതാ ശിശുവികസന ഓഫിസര്‍ എ. സരസ്വതി അമ്മമാര്‍ക്കുള്ള ഓണസമ്മാനപൊതി ഏറ്റുവാങ്ങി.