കവിയും സാംസ്‌കാരിക പ്രവര്‍ത്തകനുമായ ടി എ ശശി അബുദബിയില്‍ നിര്യാതനായി

അബുദബി: ലുലു ഗ്രൂപ്പ് ഇന്റര്‍നാഷണല്‍ മാര്‍ക്കറ്റിംഗ് വിഭാഗത്തില്‍ പ്രൂഫ് റീഡറായ തൃശൂര്‍ ചാമക്കാല സ്വദേശി ടി എ ശശി ഹൃദയസ്തംഭനം മൂലം അബുദാബിയില്‍ നിര്യാതനായി. കവിയും സാംസ്‌കാരിക പ്രവര്‍ത്തകനുമായ ശശി അബുദബിയിലെ താമസസ്ഥലത്ത് നവംബര്‍ ഒന്നിന് പുലര്‍ച്ചെയാണ് അന്തരിച്ചത്.

ആനുകാലികങ്ങളില്‍ കവിതകള്‍ എഴുതിയിരുന്ന ശശിയുടെ 'ചിരിച്ചോടും മത്സ്യങ്ങളെ' എന്ന കവിതാ സമാഹാരം പ്രസിദ്ധീകൃതമായിട്ടുണ്ട്.

ശശിയുടെ അകാല വിയോഗത്തില്‍ ലുലു ഗ്രൂപ്പില്‍ നടന്ന അനുശോചന യോഗത്തില്‍ മാര്‍ക്കറ്റിംഗ് & കമ്മ്യൂണിക്കേഷന്‍ ഡയറക്ടര്‍

വി നന്ദകുമാര്‍ അധ്യക്ഷനായി. അനുശോചന യോഗത്തില്‍ മാധ്യമപ്രവര്‍ത്തകനായ ടി പി ഗംഗാധരന്‍, ശശിയുടെ കാവ്യജീവിതം അനുസ്മരിച്ചു.

ഭൗതിക ശരീരം നടപടിക്രമങ്ങള്‍ പൂര്‍ത്തിയാക്കി നാട്ടില്‍ കൊണ്ടുപോകുമെന്ന് നന്ദകുമാര്‍ അറിയിച്ചു.

കേരള വാട്ടര്‍ അതോറിറ്റിയില്‍ അസിറ്റന്റ് എന്‍ജിനീയറായ സിന്ധുവാണ് ഭാര്യ. തീര്‍ത്ഥു, അമൃത് എന്നിവര്‍ മക്കളാണ്.