കൊടവത്ത്കുന്ന് പാലത്തിന്റെ നിര്‍മാണം വൈകുന്നത് ദുരിതമാകുന്നു

മാള: കോട്ടമുറി കൊടവത്ത്കുന്ന് പാലത്തിന്റെ നിര്‍മാണം വൈകുന്നത് ദുരിതമാകുന്നു. വൈന്തോടിന് കുറുകെയുള്ള പാലത്തിന്റെയും കോട്ടമുറി മുതലുള്ള റോഡിന്റെയും പുനര്‍നിര്‍മ്മാണം അനന്തമായി വൈകുകയാണ്. പാലവും റോഡും നിര്‍മ്മിക്കുന്നത് ജലനിധിയുടെ പൈപ്പ് മാറ്റേണ്ടതുണ്ടെങ്കിലും അതിനായുള്ള പ്രവൃത്തികള്‍ തുടങ്ങിയിട്ട് പോലുമില്ല. പാലത്തിന്റെയും റോഡിന്റെയും നിര്‍മ്മാണത്തിനായി മൂന്ന് കോടി രൂപ നേരത്തെ അനുവദിച്ചിരുന്നു. പ്രതിഷേധങ്ങള്‍ക്ക് ശേഷം പണികള്‍ ആരംഭിച്ചുവെങ്കിലും ഏറെ വൈകാതെ നിലക്കുകയായിരുന്നു. മുന്‍പേതന്നെ അപകടാവസ്ഥയിലായിരുന്ന കൊടവത്ത്കുന്ന് പാലം 2018 ലെ മഹാപ്രളയത്തില്‍ പാടെ തകര്‍ന്ന അവസ്ഥയിലായിരുന്നു. ഒപ്പം റോഡും ഒലിച്ചു പോയിരുന്നു. അതിന് ശേഷം നാട്ടുകാര്‍ സംഘടിച്ച്് മണ്ണിട്ട് റോഡ് സഞ്ചാരയോഗ്യമാക്കിയെങ്കിലും ഏറെക്കഴിയും മുന്‍പേ തകര്‍ന്നു.