സൗദിയില്‍ വളര്‍ത്തു സിംഹം യുവാവിനെ കടിച്ചുകൊന്നു

റിയാദ് : സൗദി തലസ്ഥാനത്തെ അല്‍സുലൈ ഡിസ്ട്രിക്ടില്‍ വളര്‍ത്തു സിംഹം സൗദി യുവാവിനെ കടിച്ചുകൊന്നു. 25 വയസ് പ്രായമുള്ള അബ്ദുറഹ്മാന്‍ ആണ് ദാരുണമായി കൊല്ലപ്പെട്ടത്. സുരക്ഷാ വകുപ്പുകള്‍ എത്തി സിംഹത്തെ വെടിവെച്ചു കൊന്നാണ് സൗദി പൗരനെ വേര്‍പ്പെടുത്തിയത്. ഗുരുതരമായി പരിക്കേറ്റ യുവാവ് അപ്പോഴേക്കും മരിച്ചിരുന്നു.

കിഴക്കന്‍ റിയാദിലെ ഇസ്തിറാഹയില്‍ അബ്ദുറഹിമാന്‍ ഏതാനും വന്യമൃഗങ്ങളെ രഹസ്യമായി വളര്‍ത്തുന്നുണ്ട്. വ്യാഴാഴ്ച വൈകീട്ട് ഇസ്തിറാഹയില്‍ പ്രവേശിച്ച് കൂട്ടില്‍ നിന്ന് പുറത്തിറക്കി കളിപ്പിക്കുന്നതിനിടെ യുവാവിനെ സിംഹം ആക്രമിക്കുകയായിരുന്നു. നാലു വയസ് പ്രായമുള്ള സിംഹമാണ് അപ്രതീക്ഷിതമായി ഉടമയെ തന്നെ ആക്രമിച്ച് കൊലപ്പെടുത്തിയത്. സൗദിയില്‍ വന്യമൃഗങ്ങളെ വളര്‍ത്തുന്നതും ഇറക്കുമതി ചെയ്യുന്നതുമെല്ലാം നിയമ ലംഘനമാണ്.