ബിജെപിക്ക് ഓക്‌സിജന്‍ നല്‍കി വിജയത്തിലേക്കെത്തിച്ചത് വി ഡി സതീശന്‍: പി എ മുഹമ്മദ് റിയാസ്

തിരുവനന്തപുരം: പാലക്കാട് ഉപതെരഞ്ഞെടുപ്പില്‍ ബിജെപിയുടെ രക്ഷാധികാരിയായത് വി ഡി സതീശനെന്ന് മന്ത്രി പി എ മുഹമ്മദ് റിയാസ്. ബിജെപിക്ക് ഓക്‌സിജന്‍ നല്‍കി വിജയത്തിലേക്കെത്തിച്ചത് സതീശന്റെ ഐഡിയ ആണെന്നും മുഹമ്മദ് റിയാസ് പറഞ്ഞു.മല്‍സരം യുഡിഎഫും ബിജെപിയും തമ്മിലെന്ന പ്രസ്താവനയാണ് ബിജെപിയെ രണ്ടാം സ്ഥാനത്തെത്തിച്ചതെന്നും മുഹമ്മദ് റിയാസ് പറഞ്ഞു.

ബിജെപിയുടെ സംസ്ഥാന നേതാക്കന്‍മാര്‍ക്ക് പോലുമില്ലാത്ത ആത്മവിശ്വാസം ബിജെപി പ്രവര്‍ത്തകര്‍ക്ക് അവിടെ നല്‍കിയത് പ്രതിപക്ഷ നേതാവാണ്. മല്‍സരം യുഡിഎഫും ബിജെപിയും തമ്മിലാണെന്നാണ് പ്രതിപക്ഷ നേതാവ് പറഞ്ഞത്. എന്നാല്‍ ഞങ്ങളന്നേ പറഞ്ഞു എല്‍ഡിഎഫും യുഡിഎഫും തമ്മിലാണ് മല്‍സരമെന്ന്. വോട്ടെണ്ണിക്കഴിഞ്ഞപ്പോള്‍ കേവലം ആയിരത്തി ചില്വാനം വോട്ടാണ് ഞങ്ങള്‍ക്ക് ബിജെപിയെക്കാള്‍ കുറവുണ്ടായിരുന്നത്. നാണക്കേടില്‍ നിന്നും ബിജെപിയെ കൈപിടിച്ച് രക്ഷപ്പെടുത്തിയത് പ്രതിപക്ഷ നേതാവാണെന്നും റിയാസ് പറഞ്ഞു.

ഒരേസമയം ഇരു മത വര്‍ഗീയതകളെയും പ്രതിപക്ഷ നേതാവിന്റെ നേതൃത്വത്തില്‍ യുഡിഎഫ് ശക്തിപ്പെടുത്തിയെന്നും' റിയാസ് ആരോപിച്ചു. അതേസമയം തെരഞ്ഞെടുപ്പ് ഫലം പുറത്തുവരുന്നതിന് പിന്നാലെ ബിജെപിയില്‍ കടുത്ത ആഭ്യന്തരപ്രശ്‌നങ്ങള്‍ ഉണ്ടാകുമെന്ന് നേരത്തെ തന്നെ പറഞ്ഞിരുന്നുവെന്നും റിയാസ് കൂട്ടിചേര്‍ത്തു.