സിസോദിയയുടെ അറസ്റ്റില്‍ ഡല്‍ഹിയില്‍ വ്യാപക പ്രതിഷേധം

ന്യൂഡല്‍ഹി: ഡല്‍ഹി ഉപമുഖ്യമന്ത്രി മനീഷ് സിസോദിയയുടെ അറസ്റ്റില്‍ വ്യാപക പ്രതിഷേധവുമായി ആം ആദ്മി പ്രവര്‍ത്തകര്‍. എഎപി ഓഫിസിന് മുന്നില്‍ നടന്ന പ്രതിഷേധം സംഘര്‍ഷത്തിലേക്ക് നീങ്ങിയതോടെ പ്രവര്‍ത്തകരെ പോലിസ് അറസ്റ്റ് ചെയ്ത് നീക്കി. പാര്‍ട്ടി ആസ്ഥാനത്തിന് മുന്നില്‍ പോലിസ് 144 പ്രഖ്യാപിച്ചു. അതേസമയം, മദ്യനയക്കേസില്‍ അറസ്റ്റ് ചെയ്ത ഡല്‍ഹി ഉപമുഖ്യമന്ത്രി മനീഷ് സിസോദിയയെ സിബിഐ കോടതിയില്‍ ഹാജരാക്കി.

ഞായറായ്ച രാത്രിയാണ് സിസോദിയയെ സിബിഐ അറസ്റ്റ് ചെയ്തത്. എട്ട് മണിക്കൂര്‍ നീണ്ട് നിന്ന് ചോദ്യംചെയ്യലിനൊടുവിലാണ് സിസോദിയയുടെ അറസ്റ്റ് രേഖപ്പെടുത്തിയത്. ഉപമുഖ്യമന്ത്രി പദവി വഹിക്കുന്ന വ്യക്തി ആയതിനാല്‍ ഉന്നത ഉദ്യോഗസ്ഥരുടെ അനുമതി ലഭിച്ച ശേഷമായിരുന്നു അറസ്റ്റ്.