മനോഹര്‍ പരീക്കറെ വീണ്ടും ആശുപത്രിയില്‍ പ്രവേശിപ്പിച്ചു

പനാജി: ആരോഗ്യസ്ഥിതി മോശമായതിനെത്തുടര്‍ന്ന് ഗോവ മുഖ്യമന്ത്രി മനോഹര്‍ പരീക്കറെ വീണ്ടും ആശുപത്രിയില്‍ പ്രവേശിപ്പിച്ചു. ശനിയാഴ്ച രാത്രിയില്‍ ഗോവയിലെ മെഡിക്കല്‍ കോളജ് ആശുപത്രിയിലാണ് പ്രവേശിപ്പിച്ചത്. നിലവില്‍ മുഖ്യമന്ത്രിയുടെ ആരോഗ്യനിലയില്‍ പ്രശ്‌നമില്ലെന്നും അടുത്ത 48 മണിക്കൂര്‍ നിരീക്ഷണത്തിലായിരിക്കുമെന്നും മുഖ്യമന്ത്രിയുടെ ഓഫിസ് അറിയിച്ചു.

ഗാസ്‌ട്രോഇന്റസ്റ്റീനല്‍ എന്‍ഡോസ്‌കോപ്പിക്കായാണ് ആശുപത്രിയില്‍ പ്രവേശിപ്പിച്ചതെന്നും ഓഫിസ് വ്യക്തമാക്കി. അതേസമയം, പരീക്കറുടെ ആരോഗ്യനില ഗുരുതരമാണെന്ന മാധ്യമറിപോര്‍ട്ടുകളെ കൃഷിമന്ത്രി വിജയ് സര്‍ദേശായി തള്ളി. പാന്‍ക്രിയാസ് ഗ്രന്ഥിയുടെ പ്രവര്‍ത്തനം തകരാറിലായതിനെത്തുടര്‍ന്ന് ഏറെ നാളായി ഗോവ, മുംബൈ, ഡല്‍ഹി, ന്യൂയോര്‍ക്ക് എന്നിവിടങ്ങളിലെ ആശുപത്രികളിലായി അദ്ദേഹം ചികില്‍സയിലാണ്.