മന്ത്രവാദം നടത്തിയെന്നാരോപിച്ചു യുവതിയെയും നാലു കുഞ്ഞുങ്ങളെയും തല്ലിക്കൊന്നു

ഭുവനേശ്വര്‍: മന്ത്രവാദം നടത്തിയെന്നാരോപിച്ചു യുവതിയെയും നാലു കുഞ്ഞുങ്ങളെയും തല്ലിക്കൊന്ന ആറുപേരെ പോലിസ് അറസ്റ്റു ചെയ്തു. ഒഡീഷയിലെ സുന്ദര്‍ഗറിലാണ് സംഭവം. ഭുദ്രാം മുണ്ട, ദേഭ്ര മുണ്ട എന്നിവരും ബന്ധുക്കളുമാണ് അറസ്റ്റിലായത്. മാങ്ക്രി മുണ്ട എന്നയുവതിയെയും പത്തും ഒന്നും വയസ്സായ പെണ്‍മക്കളെയും ഒമ്പതും നാലും വയസ്സുള്ള ആണ്‍മക്കളെയുമാണ് അക്രമികള്‍ തല്ലിക്കൊന്നത്. കൊലക്കു ശേഷം നാലുപേരുടെയും മൃതദേഹങ്ങള്‍ അക്രമികള്‍ കിണറ്റിലെറിയുകയായിരുന്നു. ദേഭ്ര മുണ്ടയുടെ ഭാര്യക്കും കുടുംബാംഗങ്ങള്‍ക്കും രോഗം പിടിപെട്ടിരുന്നു. ഇതിനു കാരണം മാങ്ക്രി മുണ്ടയുടെ മന്ത്രവാദമാണെന്നുമാരോപിച്ചാണു കൊലപാതകങ്ങള്‍ നടത്തിയതെന്നു പോലിസ് പറഞ്ഞു.