ഇ പി ജയരാജന്റെ പേഴ്സനൽ സ്റ്റാഫ് അംഗമായിരുന്നയാൾ പോക്സോ കേസിൽ അറസ്റ്റിൽ

പയ്യന്നൂർ: 17 വയസ്സുകാരിയായ വിദ്യാർഥിനിക്ക് മൊബൈൽ ഫോണിൽ അശ്ലീല സന്ദേശമയച്ച അധ്യാപകനെ പരിയാരം പോലിസ് അറസ്റ്റ് ചെയ്തു. പരിയാരം പോലിസ് പരിധിയിലുള്ള വിദ്യാലയത്തിലെ കായികാധ്യാപകനായ വെള്ളോറ കാര്യപ്പള്ളിയിലെ കെ സി സജീഷിനെയാണ് പോലിസ് പോക്സോ കേസ് ചുമത്തി അറസ്റ്റ് ചെയ്തത്. ഇയാളെ കോടതി റിമാൻഡ് ചെയ്തു.

കഴിഞ്ഞ ദിവസമാണ് പെൺകുട്ടി ഉപയോഗിക്കുന്ന മാതാവിന്റെ മൊബൈൽ ഫോണിലേക്ക് അശ്ലീല സന്ദേശമയച്ചത്. സംഭവം ശ്രദ്ധയില്‍പ്പെട്ടതിനെ തുടര്‍ന്ന്, പെണ്‍കുട്ടിയുടെ ബന്ധുക്കളും നാട്ടുകാരും ഇന്നലെ ഉച്ചതിരിഞ്ഞ് അധ്യാപകനെ അന്വേഷിച്ച്‌ സ്കൂളില്‍ എത്തിയിരുന്നുവെങ്കിലും അവിടെ ഉണ്ടായിരുന്നില്ല.

തുടർന്ന് പെൺകുട്ടിയുടെ ബന്ധുക്കൾ സ്കൂൾ പ്രിൻസിപ്പലിനെ വിവരമറിയിച്ചു. തുടർന്ന് പ്രിൻസിപ്പൽ പരിയാരം പോലിസിൽ പരാതി നൽകുകയായിരുന്നു. പോലിസ് അന്വേഷണം നടത്തുന്നതിനിടെ ബുധനാഴ്ച രാത്രി മാടായിപ്പാറയിൽ വെച്ചാണ് സജീഷ് പിടിയിലായത്. മുൻ മന്ത്രി ഇ പി ജയരാജന്റെ പേഴ്സനൽ സ്റ്റാഫ് അംഗമായിരുന്നു സജീഷ്.