ട്രിപ്പിള്‍ ലോക്ക് ഡൗണ്‍ ലംഘനം:എറണാകുളത്ത് ഇതുവരെ പിടികൂടിയത് 950 ഓളം വാഹനങ്ങള്‍

കൊച്ചി: കൊവിഡ് വ്യാപനം രൂക്ഷമായതോടെ എറണാകുളം ജില്ലയില്‍ ട്രിപ്പിള്‍ ലോക് ഡൗണ്‍ പ്രഖ്യാപിച്ചതിനു ശേഷം നിയന്ത്രണങ്ങള്‍ ലംഘിച്ചതിന് എറണാകുളം റൂറല്‍ ജില്ലയില്‍ പിടികൂടിയത് 950 ഓളം വാഹനങ്ങള്‍. മതിയായ രേഖകളില്ലാതെയും,അനാവശ്യമായി പുറത്തിറങ്ങിയതിനുമാണ് വാഹനങ്ങള്‍ പിടികൂടിയതെന്ന് ജില്ലാ പോലീസ് മേധാവി കെ കാര്‍ത്തിക്ക് പറഞ്ഞു.

207 വാഹനങ്ങളാണ് ഇന്നു മാത്രം പിടികൂടിയത്.കഴിഞ്ഞ ദിവസം മുതല്‍ പിടികൂടിയ വാഹനങ്ങളുടെ രജിസ്‌ടേഷന്‍ റദ്ദാക്കുന്നതിനുള്ള നടപടി സ്വീകരിക്കുന്നുണ്ടെന്നും എസ് പി പറഞ്ഞു.നിയന്ത്രണങ്ങള്‍ ലംഘിച്ചതിന് ഇന്ന് റൂറല്‍ ജില്ലയില്‍ 228 കേസുകള്‍ രജിസ്റ്റര്‍ ചെയ്തു.53 പേരെ അറസ്റ്റ് ചെയ്തു. മാസ്‌ക്ക് ധരിക്കാത്തതിന് 875 പേര്‍ ക്കെതിരെയും സാമുഹ്യ അകലം പാലിയ്ക്കാത്തതിന് 1092 പേര്‍ക്കെതിരെയും നടപടിയെടുത്തതായി എസ്പി കെ കാര്‍ത്തിക്ക് പറഞ്ഞു.