മെഡിക്കല്‍ കോളജുകളിലെ ഇഎസ്‌ഐ സംവരണം ഒഴിവാക്കിയ നടപടി അപലപനീയം: ഇ ടി മുഹമ്മദ് ബഷീര്‍ എംപി

മലപ്പുറം: ഇഎസ്‌ഐ പരിധിയില്‍ ഉള്‍പ്പെട്ടിട്ടുള്ള തൊഴിലാളികളുടെ കുട്ടികള്‍ക്ക് ഇഎസ്‌ഐ, മെഡിക്കല്‍ ഡെന്റല്‍ കോളജുകളില്‍ ഉണ്ടായിരുന്ന സംവരണം ഒരു സര്‍ക്കുലറിലൂടെ എടുത്തുകളഞ്ഞ കേന്ദ്ര സര്‍ക്കാര്‍ നടപടി അത്യധികം അപലപനീയമാണെന്ന് ഇന്ത്യന്‍ യൂനിയന്‍ മുസ്‌ലിം ലീഗ് ദേശീയ ഓര്‍ഗനൈസിംഗ് സെക്രട്ടറി ഇ ടി മുഹമ്മദ് ബഷീര്‍ എംപി. ഇത് സംബന്ധിച്ച് എസ്ടിയു മുഖേന നിയമ നടപടികള്‍ സ്വീകരിക്കുമെന്നും എംപി പറഞ്ഞു. ഈ ക്വാട്ട സമ്പ്രദായം നിര്‍ത്തല്‍ ചെയ്തത് കടുത്ത അന്യായമാണെന്ന് കേന്ദ്ര തൊഴില്‍ വകുപ്പ് മന്ത്രിക്ക് അയച്ച കത്തില്‍ എംപി ചൂണ്ടിക്കാട്ടി . തൊഴിലാളികളുടെ ഇഎസ്‌ഐ വിഹിതം അടക്കം ഉപയോഗപ്പെടുത്തി സ്ഥാപിച്ച മെഡിക്കല്‍ കോളജുകളില്‍ ആ വിഭാഗത്തിന് ലഭിച്ചുകൊണ്ടിരുന്ന ന്യായമായ ആനുകൂല്യം എടുത്ത്കളഞ്ഞത് യാതൊരു ന്യായീകരണമില്ലാത്ത നടപടിയും നന്ദികേടുമാണ്. ഇക്കാര്യത്തില്‍ അടിയന്തരമായ നടപടികള്‍ സ്വീകരിക്കണമെന്ന് തൊഴില്‍ മന്ത്രിക്ക് അയച്ച കത്തില്‍ എംപി ആവശ്യപ്പെട്ടു.