സ്വര്‍ണമാല അപഹരിക്കല്‍ കേസുകളിലെ പ്രതി പോലിസ് പിടിയില്‍

കൊച്ചി: എറണാകൂളം ജില്ലയിലെ വിവിധ സ്റ്റേഷനുകളില്‍ സ്വര്‍ണ മാല പൊട്ടിച്ചുകടന്ന കേസുകളിലെ പ്രതി പോലിസ് പിടിയില്‍. എരൂര്‍ കോച്ചേരിയില്‍ വീട്ടില്‍ സുജിത്ത് (39) ആണ് പുത്തന്‍ കുരിശ് പോലിസിന്റെ പിടിയിലായത്. പുത്തന്‍ കുരിശ് വടവുകോട് ഭാഗത്തു വച്ച് വൃദ്ധയുടെ മാല കവര്‍ന്ന കേസില്‍ ഒളിവില്‍ പോയ പ്രതി സുജിതിനെ പുത്തന്‍കുരിശ് പോലീസ് സ്റ്റേഷന്‍ ഇന്‍സ്‌പെക്ടര്‍ സാജന്‍ സേവ്യറുടെ നേതൃത്വത്തിലുള്ള അന്വേഷണ സംഘമാണ് അറസ്റ്റു ചെയ്തത്. എസ് ഐ രാജേഷ് സീനിയര്‍ സിവില്‍ പോലിസ് ഓഫീസര്‍മാരായ ബിജു ജോണ്‍, പൗലോസ്, ചന്ദ്രബോസ്, യോഹന്നന്‍, എന്നിവരും പ്രതിയെ പിടികൂടാന്‍ നേതൃത്വം നല്‍കി. കോലഞ്ചേരി ജൂഡീഷ്യല്‍ ഫസ്റ്റ് ക്ലാസ്സ് കോടതിയില്‍ ഹാജരാക്കിയ പ്രതിയെ റിമാന്‍ഡു ചെയ്തു.