ബാബാ രാംദേവിന്റെ യോഗ ശീലമാക്കൂ, പെട്രോള്‍ വില വെറും 6 രൂപ മാത്രം; കേന്ദ്രത്തെ ട്രോളി ശശി തരൂര്‍

തിരുവനന്തപുരം: പെട്രോളിന്റെയും ഡീസലിന്റെയും വിലയിലുണ്ടായ അനിയന്ത്രിതമായ വര്‍ധനയില്‍ കേന്ദ്രസര്‍ക്കാരിനെ പരിഹസിച്ച് കോണ്‍ഗ്രസ് നേതാവ് ശശി തരൂര്‍ എംപി. യോഗാചാര്യന്‍ ബാബാ രാം ദേവിന്റെ കാര്‍ട്ടൂണ്‍ ചിത്രം ട്വിറ്ററില്‍ പങ്കുവച്ചായിരുന്നു തരൂരിന്റെ പരിഹാസം. കാര്‍ട്ടൂണിലെ പ്ലക്കാര്‍ഡില്‍ പെട്രോളിന്റെ വില 90 രൂപയെന്നാണ് നല്‍കിയിരിക്കുന്നത്. ബാബാ രാംദേവിനെപോലെ തലകുത്തിനിന്നാല്‍ പെട്രോള്‍ വില 06 രൂപയായി വായിക്കാന്‍ കഴിയുമെന്നാണ് തരൂര്‍ ട്രോളിയത്.

If you took yoga lessons from BabaRamdev, you too could see petrol prices at 06 rupees a litre! pic.twitter.com/zatuS6t6cs

— Shashi Tharoor (@ShashiTharoor) February 16, 2021

രാംദേവില്‍നിന്ന് നിങ്ങള്‍ യോഗ പാഠിക്കുകയാണെങ്കില്‍, നിങ്ങള്‍ക്കും പെട്രോള്‍ വില ലിറ്ററിന് 06 രൂപയില്‍ കാണാന്‍ കഴിയും. യോഗ ശീലമാക്കൂ. പെട്രോള്‍ ലാഭിക്കൂ. വില വെറും 06 രൂപ മാത്രം ട്വീറ്റില്‍ തരൂര്‍ മലയാളത്തില്‍ കുറിച്ചു. കഴിഞ്ഞ കുറച്ചുനാളുകളായി പെട്രോളിന്റെയും ഡീസലിന്റെയും വില കുതിച്ചുയരുകയാണ്. കഴിഞ്ഞ ദിവസം പെട്രോളിന്റെ വില ഉയര്‍ന്ന് ലിറ്ററിന് 90 രൂപ വരെയെത്തി. ഈ പശ്ചാത്തലത്തിലാണ് കേന്ദ്രസര്‍ക്കാരിനെതിരേ രൂക്ഷവിമര്‍ശനവുമായി തരൂര്‍ രംഗത്തെത്തിയത്.