ട്വന്റി-20 ലോകകപ്പ്; സൂപ്പര്‍ 12 ഡിസൈഡറില്‍ ഗ്രൂപ്പ് ബി ഒപ്പത്തിനൊപ്പം

സിഡ്‌നി: ട്വന്റി-20 ലോകകപ്പിലെ സൂപ്പര്‍ 12ലെ യോഗ്യതയ്ക്കായുള്ള പോരാട്ടത്തില്‍ വെസ്റ്റ്ഇന്‍ഡീസിനും അയര്‍ലന്റിനും ജയം. ഗ്രൂപ്പ് ബിയില്‍ സിംബാബ്‌വെയ്‌ക്കെതിരേയാണ് വെസ്റ്റ്ഇന്‍ഡീസിന്റെ ജയം. 31 റണ്‍സിനാണ് കരീബിയന്‍സിന്റെ ജയം. 153 റണ്‍സിന്റെ ലക്ഷ്യമായിരുന്നു സിംബാബ് വെയ്ക്ക്. എന്നാല്‍ 18.2 ഓവറില്‍ അവര്‍ 122 റണ്‍സിന് പുറത്തായി. വിന്‍ഡീസിനായി അല്‍സാരി ജോസഫ് നാലും ജാസണ്‍ ഹോള്‍ഡര്‍ മൂന്നും വിക്കറ്റ് നേടി.

ഇതേ ഗ്രൂപ്പിലെ മറ്റൊരു മല്‍സരത്തില്‍ സ്‌കോട്ട്‌ലന്റിനെ അയര്‍ലന്റ് പരാജയപ്പെടുത്തി. തകര്‍പ്പന്‍ തിരിച്ചുവരവ് നടത്തിയാണ് അയര്‍ലന്റിന്റെ ജയം. ആറ് വിക്കറ്റിനാണ് ഐറിഷ് പടയുടെ വിജയം. 61 റണ്‍സെടുക്കുന്നതിനിടെ നാല് വിക്കറ്റ് അവര്‍ക്ക് നഷ്ടമായിരുന്നു.എന്നാല്‍ കാംഫര്‍ (72*), ഡോക്ക്രല്‍ (39*) എന്നിവരുടെ ചെറുത്ത് നില്‍പ്പ് അയര്‍ലന്റിന് ജയമൊരുക്കുകയായിരുന്നു. ഒരോവര്‍ ശേഷിക്കെയാണ് അയര്‍ലന്റിന്റെ ജയം. ഗ്രൂപ്പ് ബിയില്‍ നാല് ടീമിനും ഓരോ ജയമാണുള്ളത്. അവസാന റൗണ്ട് മല്‍സരങ്ങള്‍ക്ക് ശേഷമാണ് സൂപ്പര്‍ 12ലെത്തുന്ന രണ്ട് ടീമുകളെ തിരഞ്ഞെടുക്കുക. സ്‌കോര്‍: സ്‌കോട്ടലന്റ് 176-5, അയര്‍ലന്റ്: 180-4