മോഷണക്കേസുകളിലെ പ്രതി മോഷ്ടിച്ച ബൈക്കുമായി പിടിയില്‍

പരപ്പനങ്ങാടി: നിരവധി മോഷണക്കേസുകളില്‍ പ്രതിയായ യുവാവ് മോഷ്ടിച്ച ബൈക്കുമായി കറങ്ങുന്നതിനിടെ പോലിസ് പിടിയിലായി. ചെട്ടിപ്പടി സ്വദേശി കുറ്റിയാടി മുഹമ്മദ് ആഖിബ് (ആഷിഖ് 23) ആണ് വാഹനപരിശോധനക്കിടെ പോലിസിന്റെ വലയിലായത്. രണ്ടുമാസം മുമ്പ് വാടാനപ്പള്ളിയില്‍ നിന്നും മോഷ്ടിച്ച ബൈക്കിന്റെ നമ്പര്‍ മാറ്റി ഓടുന്നതിനിടെ ഇയാള്‍ പോലിസ് പരിശോധനയില്‍ പെടുകയായിരുന്നു. വിലകൂടിയ ബൈക്കുകള്‍ മാത്രം മോഷ്ടിക്കുകയാണ് പ്രതിയുടെ രീതി. പള്‍സര്‍ 220 ബൈക്കാണ് ഏറെയും മോഷ്ടിക്കുന്നതെന്ന് പോലിസ് പറഞ്ഞു. ഇയാള്‍ക്കെതിരെ തിരൂരങ്ങാടി, തിരൂര്‍, പരപ്പനങ്ങാടി സ്‌റ്റേഷനുകളില്‍ സമാനമായ കേസുകളുണ്ടെന്നും പോലിസ് പറഞ്ഞു. പരപ്പനങ്ങാടി സിഐ ഹണി കെ ദാസ്, എസ് ഐ നൗഷാദ് ഇബ്രാഹിം എന്നിവരുടെ നേതൃത്വത്തില്‍ വാഹന പരിശോധനക്കിടെയാണ് ഇയാള്‍ പിടിയിലാകുന്നത്. തിരൂര്‍ കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.