ഭാര്യയെ വെട്ടിക്കൊല്ലാന്‍ ശ്രമം; ഭര്‍ത്താവ് അറസ്റ്റില്‍

കോഴിക്കോട്: വടകര ചെമ്മരത്തൂരില്‍ ഭാര്യയെ വീട്ടില്‍ക്കയറി വെട്ടിക്കൊല്ലാന്‍ ശ്രമിച്ച സംഭവത്തില്‍ ഭര്‍ത്താവ് അറസ്റ്റില്‍. ചെമ്മരത്തൂരിലെ പാലയാട്ട് മീത്തല്‍ അനഘ അശോകിനെ (27) വെട്ടിയ സംഭവത്തില്‍ ഭര്‍ത്താവ് കാര്‍ത്തികപ്പള്ളിയിലെ ചെക്കിയോട്ടില്‍ ഷനൂപാണ് പിടിയിലായത്. വടകര ഒന്നാംക്ലാസ് ജുഡീഷ്യല്‍ മജിസ്‌ട്രേറ്റ് കോടതിയില്‍ ഹാജരാക്കിയ ഇയാളെ 14 ദിവസത്തേക്ക് റിമാന്‍ഡ് ചെയ്തു. വധശ്രമം ഉള്‍പ്പെടെയുള്ള വകുപ്പുകള്‍ പ്രകാരമാണ് കേസ്. അക്രമം തടയുന്നതിനിടെ അനഘയുടെ മുത്തശ്ശി മാതുവിനും പരിക്കേറ്റു.

കാര്‍ത്തികപ്പള്ളിയിലെ ഭര്‍തൃവീട്ടിലായിരുന്ന അനഘ വെള്ളിയാഴ്ചയാണ് സ്വന്തം വീടായ ചെമ്മരത്തൂരിലെത്തിയത്. ഉച്ചയ്ക്ക് 2.30ഓടെ ഷനൂപ് കത്തിയും കൊടുവാളുമായി വീട്ടിലേക്ക് വരുകയും കത്തിയെടുത്ത് വയറിനുനേരേ വീശുകയുമായിരുന്നു. കൈകൊണ്ട് തടഞ്ഞപ്പോള്‍ ഇടതുകൈക്ക് സാരമായി പരിക്കേറ്റു. പിടിവലിക്കിടെ കത്തി നിലത്തുവീണപ്പോള്‍ അരയില്‍ കരുതിയ കൊടുവാളെടുത്ത് വീണ്ടും അനഘയ്ക്കുനേരേ വീശി. അനഘയും വീട്ടുകാരും രക്ഷപ്പെട്ട് അകത്തുകയറി വാതിലടച്ച സമയത്ത് ഇയാള്‍ മകളെയും എടുത്ത് പുറത്തേക്കുപോയി. ഇതുകണ്ട നാട്ടുകാര്‍ ഇയാളെ പിടികൂടി പോലിസില്‍ ഏല്‍പ്പിക്കുകയായിരുന്നു.