ഒരു തൃണമൂല്‍ കോണ്‍ഗ്രസ് പ്രവര്‍ത്തകൻ ആക്രമിക്കപ്പെട്ടാല്‍ രണ്ട് ബിജെപി പ്രവര്‍ത്തകര്‍ തിരിച്ചാക്രമിക്കപ്പെടും: തൃണമൂൽ മന്ത്രി

കൊല്‍ക്കത്ത: തൃണമൂല്‍ പ്രവര്‍ത്തകരുടേത് വളയണിയുന്ന കൈകളല്ലെന്നും ഒരു തൃണമൂല്‍ കോണ്‍ഗ്രസ് പ്രവര്‍ത്തകനെ ആക്രമിച്ചാല്‍ രണ്ട് ബിജെപി പ്രവര്‍ത്തകര്‍ തിരിച്ചാക്രമിക്കപ്പെടുമെന്നും മുന്നറിയിപ്പ് നല്‍കി പശ്ചിമബംഗാള്‍ മന്ത്രി ഉദയന്‍ ഗുഹ. സീതല്‍കുചിയില്‍ നടന്ന പാര്‍ട്ടി സമ്മേളനത്തില്‍ സംസാരിക്കുകയായിരുന്നു ഗുഹ. ചൊവ്വാഴ്ച കൊല്‍ക്കത്തയിലും ഹൗറയിലും നടന്ന ബിജെപി പ്രതിഷേധറാലികള്‍ അക്രമാസക്തമായതിന്റെ പശ്ചാത്തലത്തിലായിരുന്നു ഗുഹയുടെ പ്രസ്താവന.

"ഞങ്ങള്‍ വളയണിയുന്നവരല്ല. ഞങ്ങളുടെ കുട്ടികളെ ആക്രമിച്ചാല്‍ ഞങ്ങള്‍ കയ്യും കെട്ടി നോക്കി നില്‍ക്കില്ല. ഞങ്ങളില്‍ ഒരാളുടെ മേല്‍ കൈവെച്ചാല്‍ അവരില്‍ രണ്ട് പേരെ തിരിച്ചാക്രമിക്കുമെന്ന കാര്യം അവര്‍ ഓര്‍ത്തിരുന്നാല്‍ നന്ന്". പ്രസംഗത്തിനിടെ ഗുഹ പറഞ്ഞു.

വിഡ്ഢിത്തം നിറഞ്ഞ പ്രസ്താവനകള്‍ നടത്തുന്ന തൃണമൂല്‍ നേതാക്കളില്‍ നിന്ന് ഇത്തരം വാക്കുകള്‍ അപ്രതീക്ഷിതമല്ലെന്ന് ബിജെപി പ്രതികരിച്ചു. തൃണമൂല്‍ കോണ്‍ഗ്രസ് നേതാക്കള്‍ നടത്തുന്ന ദുര്‍വൃത്തികള്‍ പുറത്തുവരുന്നതോടെ ഉണ്ടാകുന്ന പരിഭ്രമത്തിലാണ് അവര്‍ ഇത്തരത്തില്‍ പ്രതികരിക്കുന്നതെന്നും ബിജെപി സംസ്ഥാന വക്താവ് സമിക് ഭട്ടാചാര്യ പറഞ്ഞു.