താലിബാൻകാർ ഐഎസിൽ ചേർത്തു; മഞ്ജു വാര്യരുടെ പുതിയ ചിത്രത്തിന്റെ പേരിൽ പോലിസുകാരന്റെ വിദ്വേഷ കമന്റ്

കോഴിക്കോട്: മഞ്ജു വാര്യരുടെ പുതിയ ചിത്രത്തിന്റെ പേരിൽ പോലിസുകാരന്റെ വിദ്വേഷ കമന്റ്. മഞ്ജു വാര്യര്‍ കേന്ദ്ര കഥാപാത്രത്തെ അവതരിപ്പിക്കുന്ന ഇന്തോ-അറബിക് ചിത്രമായ അയിഷയുടെ ചിത്രീകരണം ആരംഭിച്ചുവെന്ന ഒരു ഓൺലൈൻ വാർത്തയ്ക്ക് കീഴിലാണ് പോലിസുകാരന്റെ വിദ്വേഷ കമന്റ്.

താലിബാൻകാർ ഐഎസിൽ ചേർത്തു പാവം എന്ന കമന്റാണ് വടക്കോട്ട് ​ഗോവിന്ദൻ എന്ന പ്രൊഫൈലിൽ നിന്ന് വിദ്വേഷ കമന്റ് പോസ്റ്റ് ചെയ്തിരിക്കുന്നത്. കേരള പോലിസിൽ ജോലി ചെയ്യുന്നതായാണ് ഫേസ്ബുക്ക് പ്രൊഫൈലിൽ പറഞ്ഞിരിക്കുന്നത്. പോലിസിലെ ആർഎസ്എസ് സ്വാധീനത്തെ കുറിച്ച് സിപിഎം സംസ്ഥാന സെക്രട്ടറിയടക്കം തുറന്നുപറയുന്ന സാഹചര്യത്തിലാണ് പോലിസിലെ ആർ‍എസ്എസ് സ്വാധീനം മറനീക്കി പുറത്തുവരുന്നതെന്നത് ശ്രദ്ധേയമാണ്.

റാസല്‍ ഖൈമയിലാണ് നവാഗതനായ ആമിര്‍ പള്ളിക്കാല്‍ സംവിധാനം ചെയ്യുന്ന അയിഷയുടെ ചിത്രീകരണം തുടങ്ങിയത്. ഇത് സംബന്ധിച്ച വാർത്തയ്ക്ക് താഴെയാണ് കമന്റ് പോസ്റ്റ് ചെയ്തിരിക്കുന്നത്. പോലിസിലോ സർക്കാർ ജോലിയിലോ ഉള്ളവർ സാമൂഹിക മാധ്യമങ്ങളിൽ മത-രാഷ്ട്രീയ വിഷയങ്ങളിൽ കമന്റു ചെയ്യുകയോ പോസ്റ്റ് ഇടുകയോ ചെയ്യരുതെന്ന സർക്കുലർ നിലനിൽക്കെയാണ് ന​ഗ്നമായ സർവിസ് ചട്ടലം​ഘനം നടന്നിരിക്കുന്നത്.