മലയാളിയെ കുത്തിക്കൊന്ന ഈജിപ്ഷ്യന്‍ പൗരന്റെ വധശിക്ഷ നടപ്പാക്കി

ജിദ്ദ: മലയാളിയെ കുത്തിക്കൊന്ന കേസിലെ പ്രതിയായ ഈജിപ്ഷ്യന്‍ പൗരന്റെ വധശിക്ഷ നടപ്പാക്കി സൗദി സര്‍ക്കാര്‍. അഹമ്മദ് ഫുവാദ് എന്നയാളുടെ വധശിക്ഷയാണ് നടപ്പാക്കിയിരിക്കുന്നത്. മലപ്പുറം കോട്ടക്കല്‍ പറപ്പൂര്‍ സൂപ്പി ബസാര്‍ സ്വദേശി നമ്പിയാടത്ത് കുഞ്ഞലവി(45)യാണ് 2021 ആഗസ്റ്റില്‍ കുത്തേറ്റുമരിച്ചിരുന്നത്.

പരേതനായ നമ്പിയാടത്ത് ഉണ്ണീന്‍കുട്ടി മുസ്‌ല്യാരുടെ മകനാണ് കുഞ്ഞലവി. ജിദ്ദയിലെ അല്‍ മംലക എന്ന സ്ഥാപനത്തില്‍ ജോലി ചെയ്തുവരികയായിരുന്ന കുഞ്ഞലവി രാവിലെ കാഷ് കലക്ഷന്‍ കഴിഞ്ഞു മടങ്ങവെ ജിദ്ദ സാമിര്‍ ഡിസ്ട്രിക്ടില്‍ വച്ച് ഒരുസംഘം പിന്തുടര്‍ന്ന് മാരക ആയുധങ്ങള്‍ കൊണ്ട് കുത്തിപ്പരിക്കേല്‍പ്പിച്ച ശേഷം പണവുമായി കടന്നുകളയുകയായിരുന്നു. കേസിലെ പ്രതികളെയെല്ലാം സൗദി പോലിസ് പിടികൂടിയിരുന്നു. വിചാരണയില്‍ വധശിക്ഷക്ക് വിധിക്കപ്പെട്ട പ്രതിയുടെ അപ്പീലുകളും മേല്‍ക്കോടതികള്‍ തള്ളിയിരുന്നു. തുടര്‍ന്നാണ് സര്‍ക്കാര്‍ വധശിക്ഷ നടപ്പാക്കിയത്.