വയനാട് ഉരുള്‍പൊട്ടല്‍ ദുരന്തം; പുനരധിവാസം വൈകുന്നു; യൂത്ത് കോണ്‍ഗ്രസ് മാര്‍ച്ചില്‍ സംഘര്‍ഷം
കല്‍പ്പറ്റ : വയനാട് ഉരുള്‍പൊട്ടല്‍ ദുരന്തത്തിന്റെ ഇരകളുടെ പുനരധിവാസവുമായി ബന്ധപ്പെട്ട് കേന്ദ്ര സംസ്ഥാന സര്‍ക്കാരുകള്‍ക്കെതിരെ നടത്തിയ യൂത്ത് കോണ്‍ഗ്രസ് മാര്‍ച്ചില്‍ സംഘര്‍ഷം. സംഘര്‍ഷത്തെ തുടര്‍ന്ന് പോലിസ് പ്രവര്‍ത്തകര്‍ക്ക് നേരെ ലാത്തിച്ചാര്‍ജ് നടത്തി. മൂന്ന് തവണ ലാത്തി വീശി. കലക്ടറേറ്റിലെ ഗേറ്റ് തള്ളി തുറന്ന് അകത്തു കയറാന്‍ പ്രവര്‍ത്തകര്‍ ശ്രമിച്ചപ്പോഴാണ് ആദ്യം സംഘര്‍ഷം ഉണ്ടായത്.
സ്ഥലത്ത് സമരം നടത്തുകയായിരുന്ന എന്‍ജിഒ യൂണിയന്‍ പ്രവര്‍ത്തകരും യൂത്ത് കോണ്‍ഗ്രസ് പ്രവര്‍ത്തകരും തമ്മിലും വാക്ക് തര്‍ക്കമുണ്ടായിരുന്നു. വാക്ക് തര്‍ക്കത്തിനിടെ പ്രവര്‍ത്തകരെ പിരിച്ച് വിടാന്‍ വേണ്ടിയും പോലിസിന് ലാത്തിച്ചാര്‍ജ് നടത്തേണ്ടി വന്നു. യൂത്ത് കോണ്‍ഗ്രസ് നേതാക്കളായ അമല്‍ ജോയ്, അരുണ്‍ദേവ്, ജംഷീര്‍ പള്ളിവയലിന്‍ തുടങ്ങിയവര്‍ക്ക് പരിക്കേറ്റു. സ്ഥലത്ത് സംഘര്‍ഷാവസ്ഥ തുടരുകയാണ്.