മുന്‍ ഇന്ത്യന്‍ ഫുട്‌ബോള്‍ ടീം ക്യാപ്റ്റന്‍ യു ഷറഫലി എല്‍ഡിഎഫ് സ്ഥാനാര്‍ഥി ആയേക്കും
മലപ്പുറം: മുന്‍ ഇന്ത്യന്‍ ഫുട്‌ബോള്‍ ടീം ക്യാപ്റ്റന്‍ യു ഷറഫലി ഏറനാട് മണ്ഡലത്തില്‍ എല്‍ഡിഎഫിനു വേണ്ടി മത്സരിക്കാന്‍ സാധ്യത. മലപ്പുറം ജില്ലയില്‍ നിയമസഭാ തിരഞ്ഞെടുപ്പിനുള്ള സിപിഎം സ്ഥാനാര്‍ഥികളെ സംബന്ധിച്ച ഏകദേശ ധാരണയായപ്പോഴാണ് ഷറഫലിയുടെ പേരും ഉള്‍പെട്ടത്. ഏറനാട് സിപിഐയുടെ സീറ്റായതിനാല്‍ അവരുടെ നിലപാട് കൂടി അറിഞ്ഞ ശേഷമാകും മറ്റു കാര്യങ്ങളിലേക്കു കടക്കുക.
ജില്ലയില്‍ സിറ്റിങ് എംഎല്‍എമാര്‍ മത്സരിക്കുമെന്നാണ് അറിയുന്നത്. തവനൂരില്‍ കെ.ടി.ജലീല്‍, പൊന്നാനി പി.ശ്രീരാമകൃഷ്ണന്‍, നിലമ്പൂര്‍ പി.വി. അന്‍വര്‍, താനൂര്‍ വി. അബ്ദുറഹിമാന്‍ എന്നിവര്‍ മത്സരിക്കും. തിരൂരിലും മങ്കടയിലും കഴിഞ്ഞ തവണ മത്സരിച്ച് പരാജയപ്പെട്ടവര്‍ തന്നെയാണ് പട്ടികയിലുള്ളത്. ഗഫൂര്‍ പി. ലില്ലീസ് തിരൂരും ടി.കെ. റഷീദലി മങ്കടയിലും മത്സരിക്കും. വണ്ടൂരില്‍ എ.പി. അനില്‍ കുമാറിനെതിരെ പള്ളിക്കല്‍ മുന്‍ പഞ്ചായത്ത് പ്രസിഡന്റ് പി. മിഥുന മത്സരിക്കാന്‍ സാധ്യതയുണ്ട്. മുസ്‌ലിം ലീഗ് സ്ഥാനാര്‍ഥിയായി വിജയിച്ച് പഞ്ചായത്ത് പ്രസിഡന്റായ മിഥുന പിന്നീട് ലീഗുമായി പിണങ്ങിയിരുന്നു.