പന്ത്രണ്ടുകാരിയെ പീഡിപ്പിച്ച കേസില്‍ അമ്മയുടെ സുഹൃത്തിന് നാല് ജീവപര്യന്തം തടവ്
കൊല്ലം: പന്ത്രണ്ടുകാരിയെ ബലാല്‍സംഗം ചെയ്ത കേസില്‍ പത്തനംതിട്ട സീതത്തോട് ചിറ്റാര്‍ സ്വദേശി ജയ്‌മോനെ നാലു ജീവപര്യന്തം തടവിന് ശിക്ഷിച്ചു. പീഡനത്തിനിരയായ പെണ്‍കുട്ടിയുടെ അമ്മയുടെ സുഹൃത്താണ് ജെയ്‌മോന്‍. നിരവധി പോക്‌സോ കേസുകളില്‍ പ്രതിയായ ജെയ്‌മോനെതിരെ കൊലപാതക കേസും നിലവിലുണ്ടെന്ന് പുനലൂര്‍ ഫാസ്റ്റ് ട്രാക്ക് സ്‌പെഷ്യല്‍ കോടതി ചൂണ്ടിക്കാട്ടി. കുട്ടിയുടെ അമ്മ സമാന കേസില്‍ ശിക്ഷിക്കപ്പെട്ട് തമിഴ്‌നാട്ടിലെ ജയിലിലാണ്.
ആര്യങ്കാവ് കുളിര്‍കാട് എസ്‌റ്റേറ്റില്‍ അമ്മയോടൊപ്പം താമസിച്ചിരുന്ന 12കാരിയെ 2016 മുതല്‍ ജെയ്‌മോന്‍ പീഡിപ്പിച്ചിരുന്നു. 2018ല്‍ കുട്ടിയെ കാണാനില്ലെന്ന് കാട്ടി ഇവര്‍ പോലിസില്‍ പരാതി നല്‍കി. കുട്ടിയെ കണ്ടെത്തി പോലിസ് ചോദ്യം ചെയ്തപ്പോഴാണ് പീഡന വിവരങ്ങള്‍ പുറത്തുവന്നത്. തുടര്‍ന്ന് തെന്മല പോലിസ് കേസ് രജിസ്റ്റര്‍ ചെയ്യുകയായിരുന്നു. പ്രതിക്കെതിരെ മറ്റ് ജില്ലകളിലും പോക്‌സോ കേസുകളുണ്ട്. മലപ്പുറം കാളികാവ് പോലിസ് സ്‌റ്റേഷന്‍ പരിധിയിലെ കൊലക്കേസിലും ഇയാള്‍ പ്രതിയാണ്.
