ജയ്പൂര്‍: സംവരണമാവശ്യപ്പെട്ട് ഗുജ്ജാറുകള്‍ സംസ്ഥാന വ്യാപകമായി സംഘടിപ്പിക്കുന്ന പ്രക്ഷോഭങ്ങള്‍ മൂന്നാംദിവസത്തേക്ക് കടന്നതോടെ സമവായ നീക്കവുമായി സര്‍ക്കാര്‍. സമരക്കാരുമായി തുറന്ന ചര്‍ച്ചയ്ക്ക് സര്‍ക്കാര്‍ തയ്യാറാണെന്നാണ് മുഖ്യമന്ത്രി അശോക് ഗെഹ്‌ലോട്ട് കഴിഞ്ഞദിവസം പറഞ്ഞത്. സംവരണ പ്രക്ഷോഭവുമായി ബന്ധപ്പെട്ട് റെയില്‍,റോഡ് ഗതാഗതം തടസ്സപ്പെടുത്തരുതെന്നും അദ്ദേഹം അഭ്യര്‍ത്ഥിച്ചു. സമരം ശക്തമായതോടെ ദോല്‍പൂരില്‍ സമരക്കാരുമായി ഏറ്റുമുട്ടിയ പോലിസിനുനേരെ കല്ലേറ് നടന്നു. ഏതാനും പോലിസ് വാഹനങ്ങള്‍ തീവച്ചു നശിപ്പിക്കുകയും ചെയ്തിട്ടുണ്ട്.