കെ റെയില്‍ സമരങ്ങളുമായി ബന്ധപ്പെട്ട കേസുകള്‍ പിന്‍വലിക്കില്ലെന്ന് പോലിസ്
കേസ് നടപടികളുമായി മുന്നോട്ടുപോവും
തിരുവനന്തപുരം: കെ റെയില്‍ സമരങ്ങളുമായി ബന്ധപ്പെട്ട കേസുകള്‍ പിന്‍വലിക്കില്ലെന്ന് പോലിസ്. അത്തരമൊരു നിര്‍ദേശം സര്‍ക്കാര്‍ തലത്തില്‍നിന്ന് വന്നിട്ടില്ലെന്നാണ് പോലിസ് വിശദീകരണം. കേസ് നടപടികളുമായി മുന്നോട്ടുപോവും. അറസ്റ്റ് ഉള്‍പ്പെടെയുള്ള നടപടികള്‍ ഉണ്ടാവില്ലെന്നും പോലിസ് പറഞ്ഞു.
കെ റെയില്‍ കല്ലിടല്‍ അവസാനിപ്പിക്കുന്നതായി കഴിഞ്ഞ ദിവസം റവന്യൂ വകുപ്പ് ഉത്തരവിറക്കിയിരുന്നു. ഇനി ജിപിഎസ് സംവിധാനം വഴിയാണ് സാമൂഹികാഘാത പഠനം നടത്തുക. ജനകീയ പ്രതിഷേധങ്ങള്‍ക്ക് മുന്നില്‍ മുട്ടുമടക്കിയാണ് സര്‍ക്കാര്‍ കല്ലിടല്‍ നിര്‍ത്തിവെച്ചതെന്നും നടപടി തെറ്റാണെന്ന് ബോധ്യപ്പെട്ടെങ്കില്‍ കേസുകള്‍ പിന്‍വലിക്കണമെന്നും പ്രതിപക്ഷനേതാവും കെപിസിസി പ്രസിഡന്റും ആവശ്യപ്പെട്ടിരുന്നു.