കോണ്‍ഗ്രസിന് കുറവ് സീറ്റ് നല്‍കിയത് ഭരണം അട്ടിമറിക്കപ്പെടാതിരിക്കാനെന്ന് കനിമൊഴി
' പല സംസ്ഥാനങ്ങളിലും വിജയിച്ച് അധികാരത്തിലേറിയ സര്‍ക്കാരിനെ ബിജെപി ഇല്ലാതാക്കിയത് നിങ്ങള്‍ക്ക് കാണാം'
ചെന്നൈ : തമിഴ്‌നാട്ടിലെ മതനിരപേക്ഷ മുന്നണിയില്‍ കോണ്‍ഗ്രസിന് കുറവ് സീറ്റ് നല്‍കാന്‍ കാരണം വിജയിച്ചാല്‍ ബിജെപി ഭരണം അട്ടിമറിക്കാതിരിക്കാനെന്ന് കനിമൊഴി എംപി. പല സംസ്ഥാനങ്ങളിലും തിരഞ്ഞെടുപ്പില്‍ വിജയിച്ച ശേഷം കോണ്‍ഗ്രസ് അംഗങ്ങള്‍ ബിജെപിയിലേക്ക് കൂറുമാറി ഭരണം അട്ടിമറിക്കുന്നത് ചൂണ്ടിക്കാണിച്ചാണ് കനിമൊഴി കോണ്‍ഗ്രസിനോടുള്ള വിശ്വാസക്കുറവ് വ്യക്തമാക്കിയത്.
' പല സംസ്ഥാനങ്ങളിലും വിജയിച്ച് അധികാരത്തിലേറിയ സര്‍ക്കാരിനെ ബിജെപി ഇല്ലാതാക്കിയത് നിങ്ങള്‍ക്ക് കാണാം. തിരഞ്ഞെടുപ്പിന് ഒരു മാസം മുന്‍പ് പുതുച്ചേരിയിലും നമ്മള്‍ ആ കാഴ്ച കണ്ടു. അതിനാല്‍ കൂടുതല്‍ സീറ്റില്‍ ഡിഎംകെ സ്ഥാനാര്‍ത്ഥികള്‍ ജയിച്ച് വന്നാലേ സ്ഥിരതയുള്ള സര്‍ക്കാര്‍ രൂപീകരിക്കാന്‍ കഴിയു. അത് മനസ്സിലാക്കിയാണ് കോണ്‍ഗ്രസ് ഉള്‍പ്പെടെയുള്ള സഖ്യകക്ഷികള്‍ക്ക് സീറ്റ് കുറച്ച് നല്‍കിയത്', എന്നാണ് കനിമൊഴി പറഞ്ഞത്.