ലണ്ടന്‍: ലണ്ടന്‍ സ്‌കൂള്‍ ഓഫ് എക്കണോമിക്‌സില്‍(എല്‍എസ്ഇ)യില്‍ നടന്ന പരിപാടിക്കിടെ മുസ്‌ലിം വിദ്യാര്‍ഥിയെ താലിബാനി എന്നു വിളിച്ച വിവാദ ആള്‍ദൈവം സദ്ഗുരു. എല്‍എസ്ഇയില്‍ യൂത്ത് ആന്റ് ട്രൂത്ത്: അണ്‍പ്ലഗ് വിത്ത് സദ്ഗുരു എന്ന പരിപാടിയില്‍ വിദ്യാര്‍ഥികളുമായി സംസാരിക്കവെയാണ് ജഗ്ഗി വാസുദേവ് എന്ന സദ്ഗുരു താലിബാനി പരാമാര്‍ഷം നടത്തിയത്. തുടര്‍ന്ന് പരാമര്‍ശത്തിനെതിരേ വിദ്യാര്‍ഥി യൂണിയന്‍ രംഗത്തെത്തി. ജഗ്ഗി വാസുദേവ് എന്ന സദ്ഗുരുവിന് ഇസ്ലാമോഫോബിയ ആണെന്ന് യൂണിയന്‍ വ്യക്തമാക്കി. ബിലാല്‍ ബിന്‍ സാഖിബ് എന്ന പാക് മുസ്‌ലിം വിദ്യാര്‍ഥിയെയാണ് താലിബാനി എന്ന് വിളിച്ചത്. ക്യാംപസില്‍ ഇത്തരം പരാമര്‍ശങ്ങള്‍ ഒരിക്കലും അംഗീകരിക്കാനാകില്ലെന്നും സദ്ഗുരുവിന്റെ നടപടി ഖേദകരമാണെന്നും യൂണിയന്‍ അറിയിച്ചു.
ഇതോടെ താന്‍ അങ്ങനെ ഉദ്ദേശിച്ചില്ല എന്ന് വ്യക്തമാക്കി സദ്ഗുരു പിന്നീട് തന്റെ ഔദ്യോഗിക വെബ്‌സൈറ്റില്‍ വിശദീകരണവുമായി രംഗത്തെത്തി. എന്നാല്‍ വീഡിയോ അംഗീകരിക്കാന്‍ വിദ്യാര്‍ഥി യൂണിയന്‍ തയ്യാറായില്ല. തുടര്‍ന്ന് ഈ വീഡിയോ സദ്ഗുരുവിന്റെ ചാനലില്‍ നിന്നും ഡിലീറ്റ് ചെയ്തു.
നേരത്തെ സംഘപരിവാറിനെതിരെയും ഹിന്ദുത്വ ഭീകരതയ്‌ക്കെതിരെയും ജെഎന്‍യു ക്യാംപസില്‍ ശബ്ദം ഉയര്‍ത്തിയ വിദ്യാര്‍ഥി നേതാക്കളായ കനയ്യ കുമാറും ഉമര്‍ ഖാലിദും അടക്കമുളള വിദ്യാര്‍ഥി നേതാക്കളെ തെരുവില്‍ നേരിടണം എന്ന് ജഗ്ഗി വാസുദേവ് ഒരു അഭിമുഖത്തില്‍ പറഞ്ഞിരുന്നതും വിവാദമായിരുന്നു.