മലപ്പുറം താനൂരില്‍നിന്നു കാണാതായ രണ്ടു പ്ലസ് വണ്‍ വിദ്യാര്‍ഥിനികളും നാളെ നാട്ടിലെത്തും
മുംബൈ: മലപ്പുറം താനൂരില്‍നിന്നു കാണാതായ രണ്ടു പ്ലസ് വണ്‍ വിദ്യാര്‍ഥിനികളും നാളെ നാട്ടിലെത്തും. മുംബൈയില്‍ നിന്നുള്ള ട്രെയിന്‍ യാത്രയ്ക്കിടെ ലോണാവാലയിലാണ് ഇവരെ കണ്ടെത്തിയത്. ഇന്ന് വൈകീട്ട് അഞ്ചരയോടെ പോലിസ് യാത്ര തിരിക്കും.
ഒരു സാഹസിക യാത്ര എന്ന നിലക്കാണ് കുട്ടികള്‍ പോയതെന്നു മാത്രമേ ഇപ്പോള്‍ പറയാനാകൂ എന്നാണ് പോലിസ് പറയുന്നത്. കുട്ടികള്‍ വന്നതിനു ശേഷം കാര്യങ്ങള്‍ വിശദമായി ചോദിച്ചറിയുമെന്ന് പോലിസ് മേധാവി ആര്‍ വിശ്വനാഥന്‍ പറഞ്ഞു.
സിഎസ്എംടിയില്‍ നിന്ന് ചെന്നൈ എഗ്മോര്‍ ട്രെയിനില്‍ യാത്ര ചെയ്യുകയായിരുന്ന ഇവരെ റെയില്‍വേ പോലിസ് ആണ് കണ്ടത്. കേരള പോലിസ് കൈമാറിയ ഫോട്ടോയില്‍ നിന്നാണ് കുട്ടികളെ തിരിച്ചറിഞ്ഞത്.
ബുധനാഴ്ച ഉച്ചയ്ക്കു 12നാണു താനൂര്‍ മേഖലയിലെ സ്‌കൂളിന്റെ പരിസരത്തുനിന്ന് കുട്ടികളെ കാണാതായത്. പരീക്ഷയ്ക്കു പോകുന്നെന്നു പറഞ്ഞു വീട്ടില്‍നിന്നിറങ്ങിയ ഇരുവരും സ്‌കൂളില്‍ എത്തിയില്ല. സ്‌കൂള്‍ അധികൃതര്‍ വീട്ടിലേക്കു വിളിച്ചപ്പോഴാണു കാണാതായ വിവരമറിയുന്നത്.
