ഗൗതം അദാനിക്കെതിരെ യുഎസ് കോടതി അഴിമതി കുറ്റം; സിബിഐ അന്വേഷണം വേണമെന്ന് സിപിഎം
ന്യൂഡല്‍ഹി: ഗൗതം അദാനിക്കെതിരെ യുഎസ് കോടതി അഴിമതി കുറ്റം ചുമത്തിയ സംഭവത്തില്‍ സിബിഐ അന്വേഷണം വേണമെന്ന് സിപിഎം പോളിറ്റ് ബ്യൂറോ. 20 വര്‍ഷത്തിനുള്ളില്‍ 2 ബില്യണ്‍ ഡോളര്‍ ലാഭം പ്രതീക്ഷിക്കുന്ന കരാറുകള്‍ നേടുന്നതിനും ഇന്ത്യയിലെ ഏറ്റവും വലിയ സോളാര്‍ പവര്‍ പ്ലാന്റ് വികസിപ്പിക്കുന്നതിനും ഇന്ത്യന്‍ ഉദ്യോഗസ്ഥര്‍ക്ക് ഏകദേശം 265 മില്യണ്‍ ഡോളര്‍ (ഏകദേശം 2,100 കോടി രൂപ) കൈക്കൂലി നല്‍കിയെന്നാണ് കേസ്. ഗൗതം അദാനി, ബന്ധു സാഗര്‍ അദാനി ഉള്‍പ്പെടെ ഏഴ് പേരാണ് കേസിലെ പ്രതികള്‍.
പദ്ധതിക്കായി അദാനി ഗ്രൂപ്പ് കോടിക്കണക്കിന് ഡോളര്‍ സമാഹരിച്ച യുഎസ് ബാങ്കുകളില്‍ നിന്നും നിക്ഷേപകരില്‍ നിന്നും ഇത് മറച്ചുവെച്ചതായി കോടതി പറഞ്ഞു. സര്‍ക്കാര്‍ ഉദ്യോഗസ്ഥരുടെ ഇത്രയും വലിയ തോതിലുള്ള കൈക്കൂലി വെളിപ്പെടുത്തേണ്ടി വന്നത് ഇന്ത്യയിലല്ല, അമേരിക്കയിലാണെന്നത് ലജ്ജാകരമാണെന്ന് സിപിഎം പ്രസ്താവനയില്‍ പറഞ്ഞു. നരേന്ദ്ര മോദി സര്‍ക്കാരിന് 'ഇനിയും പുകമറയ്ക്ക് പിന്നില്‍ ഒളിക്കാന്‍ കഴിയില്ല', അമേരിക്കയില്‍ പ്രോസിക്യൂഷന്‍ നല്‍കിയ വസ്തുതകളുടെ അടിസ്ഥാനത്തില്‍ ഉടന്‍ തന്നെ കേസെടുക്കാന്‍ സിബിഐക്ക് നിര്‍ദ്ദേശം നല്‍കണം.
പൊതുസേവകര്‍ക്ക് കൈക്കൂലി നല്‍കുന്നത് അഴിമതി നിരോധന നിയമത്തിന് കീഴിലാണ്. അത് സിബിഐയുടെ പരിധിയിലാണ്. സൗരോര്‍ജ്ജ വിതരണത്തിനായി വൈദ്യുതി വില്‍പ്പന കരാറുകള്‍ നടപ്പാക്കാന്‍ സംസ്ഥാന വൈദ്യുതി വിതരണ കമ്പനികളെ ലഭിക്കുന്നതിന് 2,029 കോടി രൂപ കേന്ദ്ര സര്‍ക്കാര്‍ ഉദ്യോഗസ്ഥര്‍ക്ക് വാഗ്ദാനം ചെയ്തതായി കുറ്റപത്രത്തില്‍ പറയുന്നുണ്ട്.
സര്‍ക്കാര്‍ ഉദ്യോഗസ്ഥര്‍ക്ക് വാഗ്ദാനം ചെയ്ത കൈക്കൂലിയുടെ കൃത്യമായ വിവരങ്ങള്‍ ഉള്‍പ്പെടുന്ന തെളിവുകള്‍ സാഗര്‍ അദാനിയില്‍ നിന്ന് ശേഖരിച്ചതായും കുറ്റപത്രത്തില്‍ പറയുന്നു. ഇത്രയും വലിയ തോതിലുള്ള കൈക്കൂലിയും സര്‍ക്കാര്‍ ഉദ്യോഗസ്ഥരെ അദാനി വിലക്കുവാങ്ങുന്നത് അമേരിക്കന്‍ നീതിന്യായ വ്യവസ്ഥയിലൂടെ തുറന്നുകാട്ടേണ്ടിവന്നത് ലജ്ജാകരമാണ്.
ഗൗതം അദാനിക്കും അദ്ദേഹത്തിന്റെ ബിസിനസ്സ് സാമ്രാജ്യത്തിനും നിയമവിരുദ്ധവും ക്രിമിനല്‍ പ്രവര്‍ത്തനങ്ങളും നടപ്പാക്കാന്‍ മോദി സര്‍ക്കാരിന്റെ പൂര്‍ണ്ണ സംരക്ഷണമുണ്ട്. ഹിന്‍ഡന്‍ബര്‍ഗ് വെളിപ്പെടുത്തലില്‍ നിന്ന് ഉയര്‍ന്നുവരുന്ന ആരോപണങ്ങളില്‍ നിന്ന് പ്രധാനമന്ത്രി മോദി തന്നെ അദാനിയെ രക്ഷിച്ചു. അദാനി ഗ്രൂപ്പിന്റെ ക്രമക്കേടുകള്‍ പുറത്തുകൊണ്ടുവരാന്‍ ഒരു സ്വതന്ത്ര ഏജന്‍സിയുടെ അന്വേഷണം ആവശ്യമാണെന്ന് സിപിഎം ആവശ്യപ്പെട്ടു.