വീട്ടുമുറ്റത്ത് കെ റെയില്‍ സര്‍വേ കുറ്റി സ്ഥാപിക്കുന്നത് തടഞ്ഞ വീട്ടുടുമസ്ഥനെതിരേ ജാമ്യമില്ലാ വകുപ്പ് പ്രകാരം കേസെടുത്ത് പോലിസ്
പൊതുമുതല്‍ നശിപ്പിച്ചെന്നും,ക്യത്യനിര്‍വഹണം തടസപ്പെടുത്തിയെന്നുമാരോപിച്ചാണ് കേസ്
കോഴിക്കോട്:വീടിന്റെ മുറ്റത്ത് സര്‍വേ കുറ്റി സ്ഥാപിക്കുന്നത് എതിര്‍ത്ത വീട്ടുടുമസ്ഥനെതിരേ ജാമ്യമില്ലാ വകുപ്പ് പ്രകാരം കേസെടുത്ത് പോലിസ്. 10 ലക്ഷം രൂപ വരുന്ന സര്‍വേ ഉപകരണം നശിപ്പിച്ചുവെന്ന കുറ്റമാണ് കോഴിക്കോട് കുണ്ടായിത്തോട് സ്വദേശി എ മുജീബ് റഹ്മാനെതിരേ ചുമത്തിയിരിക്കുന്നത്.
സ്വകാര്യ സ്ഥലത്ത് സര്‍വേ കുറ്റികള്‍ സ്ഥാപിക്കുന്നത് ഹൈക്കോടതി തടഞ്ഞിരുന്നു.ഒരു മുന്നറിയിപ്പുമില്ലാതെ ഡിസംബര്‍ 23നാണ് കെ റെയില്‍ ഉദ്യോഗസ്ഥര്‍ മുജീബ് റഹ്മാന്റെ വീട്ടുമുറ്റത്ത് സര്‍വേ കുറ്റി സ്ഥാപിച്ചത്. വീട്ടുകാര്‍ എതിര്‍ത്തതോടെ ഉദ്യോഗസ്ഥര്‍ തിരികെ പോവുകയും ചെയ്തു. എന്നാല്‍ പിന്നീട് 10 ലക്ഷം രൂപ വരുന്ന ഡി ജി പി എസ് എന്ന സര്‍വേ ഉപകരണം മുജീബ് റഹ്മാന്‍ കേട് വരുത്തിയെന്ന പേരില്‍ പോലിസ് കേസെടുക്കുകയായിരുന്നു. പൊതുമുതല്‍ നശിപ്പിച്ചതിനും,ക്യത്യനിര്‍വഹണം തടസപ്പെടുത്തിയതിനും ജാമ്യമില്ലാ വകുപ്പ് പ്രകാരമാണ് കേസെടുത്തത്.
പിന്നീട് ആളില്ലാത്ത സമയത്ത് മുജീബ് റഹ്മാന്റെ വീട്ടിലെത്തിയ പോലിസ് വീട്ടുമുറ്റത്ത് സര്‍വേ കുറ്റി സ്ഥാപിച്ചു.പോലിസ് കര്‍ശന നടപടിയിലേക്ക് കടക്കുമ്പോള്‍ പ്രതിഷേധം കുറയുമെന്നാണ് പോലിസ് ഉദ്യോഗസ്ഥരുടെ അനുമാനം. സര്‍വേ നടപടികള്‍ തടസ്സപ്പെടുത്തുന്നവര്‍ക്കെതിരേ ജാമ്യമില്ലാ വകുപ്പ് പ്രകാരം കേസെടുക്കാനാണ് സ്‌റ്റേഷന്‍ ഓഫിസര്‍മാര്‍ക്ക് മേലുദ്യോഗസ്ഥരുടെ നിര്‍ദേശം.