പരപ്പനങ്ങാടി: മോദി സര്‍ക്കാര്‍ അധികാരമേറ്റെടുക്കുന്നതിന്റെ ഭാഗമായി നടത്തിയ ആഹ്ലാദ പ്രകടനത്തിന്റെ മറവില്‍ ബിജെപി നടത്തിയ അക്രമത്തില്‍ പരിക്കേറ്റവരെ എസ്ഡിപിഐ നേതാക്കള്‍ സന്ദര്‍ശിച്ചു.
ബിജെപി ആക്രമണത്തെ തുടര്‍ന്ന് ഗുരുതര പരിക്കേറ്റ താനൂര്‍ ഷാഫിയെ എസ്ഡിപിഐ സംസ്ഥാന പ്രസിഡന്റ് മജീദ് ഫൈസി, പോപുലര്‍ ഫ്രണ്ട് നേതാക്കളായ ഹമീദ് മാസ്റ്റര്‍, സാലിഹ് വളാഞ്ചേരി എന്നിവരാണ് സന്ദര്‍ശിച്ചത്. നെഞ്ചിനും തലക്കും കുത്തേറ്റു കോട്ടക്കല്‍ സ്വകാര്യ ആശുപത്രിയില്‍ പ്രവേശിപ്പിച്ച ഷാഫി അപകടനില തരണം ചെയ്തിട്ടുണ്ട്.
വ്യാഴാഴ്ച വൈകീട്ട് ഏഴോടെ താനൂര്‍ ജങ്ഷനിലായിരുന്നു ബിജെപി പ്രവര്‍ത്തകരുടെ ആക്രമണം. പ്രകോപന മുദ്രാവാക്യങ്ങളുമായെത്തിയ ബിജെപി പ്രവര്‍ത്തകരുടെ പ്രകടനം താനൂര്‍ ജങ്ഷനിലെത്തിയപ്പോള്‍ കടകള്‍ക്കു നേരെ ആക്രമണം നടത്തുകയായിരുന്നു. എസ്ഡിപിഐ പ്രവര്‍ത്തകരുടെ ഫ്രൂട്‌സ് കടയും പച്ചക്കറി കടയും അടിച്ചുതകര്‍ക്കുകയുമായിരുന്നു.