കൊച്ചി: പോലിസ് സ്റ്റേഷനില്നിന്നും പ്രതികള്‍ രക്ഷപ്പെട്ടു. എറണാകുളം ചേരാനല്ലൂര്‍ പോലിസ് സ്റ്റേഷനില്‍ നിന്നും അരുണ്‍ സെബൈസ്റ്റ്യന്‍, ആന്റണി ഡി കോസ്റ്റ എന്നീ പ്രതികളാണ് രക്ഷപ്പെട്ടത്. മയക്കുമരുന്ന്, പിടിച്ചുപറി തുടങ്ങിയ ഏഴിലേറെ കേസുകളാണ് ഇരുവര്‍ക്കുമെതിരേയുള്ളത്. ഇവരില്‍ അരുണ്‍ കോടതി റിമാന്‍ഡ് ചെയ്ത പ്രതിയാണ്.
തുടര്‍നടപടികള്‍ക്കായി സ്റ്റേഷനില്‍ കസ്റ്റഡിയിലിരിക്കവെയാണ് ഇവര്‍ രക്ഷപ്പെട്ടത്. പ്രതികള്‍ തമ്മില്‍ പരസ്പരം കലഹിക്കുന്നത് ഒഴിവാക്കുന്നതിനായി അരുണ്‍ സെബാസ്റ്റ്യനെ സെല്ലിനുള്ളിലും ആന്റണി ഡി കോസ്റ്റയെ സെല്ലിന് പുറത്തുമാണ് ഇരുത്തിയിരുന്നത്. രാത്രി 11 മണിയോടെ ഇരുവരും സ്റ്റേഷനില്നിന്നും രക്ഷപ്പെടുകയായിരുന്നു. പോലിസ് വ്യാപക തിരച്ചില്‍ തുടരുകയാണ്.