ഐപിഎല്ലില്‍ രക്ഷയില്ലാതെ മുംബൈ ഇന്ത്യന്‍സ്; തോല്‍വി പരമ്പര തുടരുന്നു
ധവാന്‍ (70), അഗര്‍വാള്‍(70) എന്നിവരുടെ അര്‍ദ്ധസെഞ്ചുറിയുടെ ചിറകിലേറിയാണ് 198 റണ്‍സ് നേടിയത്.
മുംബൈ: ഐപിഎല്ലില്‍ മുംബൈ ഇന്ത്യന്‍സിന് തുടര്‍ച്ചയായ അഞ്ചാം തോല്‍വി. ഇന്ന് പഞ്ചാബ് കിങ്‌സിനോട് 12 റണ്‍സിന്റെ തോല്‍വിയും മുംബൈ ഏറ്റുവാങ്ങി. ഈ സീസണിലെ ആദ്യ ജയത്തിനായി മുംബൈക്ക് ഇനിയും കാത്തിരിക്കണം. 199 റണ്‍സിന്റെ ലക്ഷ്യം പിന്‍തുടര്‍ന്ന മുംബൈക്ക് ഒമ്പത് വിക്കറ്റ് നഷ്ടത്തില്‍ 186 റണ്‍സ് നേടാനെ കഴിഞ്ഞുള്ളൂ. സൂര്യകുമാര്‍ യാദവ്( 43), ബ്രിവിസ് (49), തിലക് വര്‍മ്മ (36), രോഹിത്ത് ശര്‍മ്മ എന്നിവരാണ് മുംബൈക്കായി പൊരുതി നിന്നവര്‍.
മൂന്നോവറില്‍ നാല് വിക്കറ്റ് നേടിയ ഒഡീന്‍ സ്മിത്തിന്റെ ബൗളിങ് പഞ്ചാബിന് തുണയായി. കഗിസോ റബാദ രണ്ടും വിക്കറ്റ് നേടി.
നേരത്തെ ആദ്യം ബാറ്റ് ചെയ്ത പഞ്ചാബ് ശിഖര്‍ ധവാന്‍ (70), മായങ്ക് അഗര്‍വാള്‍(70) എന്നിവരുടെ അര്‍ദ്ധസെഞ്ചുറിയുടെ ചിറകിലേറിയാണ് അഞ്ച് വിക്കറ്റ് നഷ്ടത്തില്‍ 198 റണ്‍സ് നേടിയത്. അഞ്ച് മല്‍സരങ്ങളില്‍ മൂന്ന് ജയവുമായി പഞ്ചാബ് മൂന്നാം സ്ഥാനത്തേക്ക് കയറി.