രവി ശാസ്ത്രി അഹ്മദാബാദ് ഫ്രാഞ്ചൈസിയുടെ കോച്ച്; വാര്‍ണറും രാഹുലും ടീമില്‍
ബട്‌ലര്‍, രവിചന്ദ്ര അശ്വിന്‍ എന്നിവരെ എന്ത് വിലകൊടുത്തും ടീമിലെത്തിക്കാനാണ് പുതിയ ടീമിന്റെ തീരുമാനം.
അഹ്മദാബാദ്: ലോകകപ്പോടെ ഇന്ത്യന്‍ ടീമിന്റെ പരിശീലക സ്ഥാനം ഒഴിയുന്ന രവി ശാസ്ത്രി ഐപിഎല്ലിലേക്ക് കടക്കുന്നു. ഐപിഎല്ലിലെ പുതിയ ഫ്രാഞ്ചൈസിയായ അഹ്മദാബാദിന്റെ പരിശീലകനാവാനാണ് ശാസ്ത്രി തയ്യാറെടുക്കുന്നത്. ഇതിനുള്ള ചര്‍ച്ചകള്‍ തുടരുകയാണ്. ശാസ്ത്രി പുതിയ സ്ഥാനത്തിന് സമ്മതം മൂളിയെന്നാണ് റിപ്പോര്‍ട്ട്.
അതിനിടെ കഴിഞ്ഞ സീസണില്‍ മോശം ഫോമിലായ സണ്‍റൈസേഴ്‌സ് അഹമ്മദാബാദിന്റെ ഓസിസ് താരം ഡേവിഡ് വാര്‍ണറും അഹ്മദാബാദ് ടീമിലേക്ക് എത്തുമെന്നാണ് റിപ്പോര്‍ട്ട്. ലോകകപ്പില്‍ തകര്‍പ്പന്‍ പ്രകടനം തുടരുന്ന വാര്‍ണര്‍ അടുത്ത തവണയും താന്‍ ഐപിഎല്ലില്‍ ഉണ്ടാവുമെന്ന് വ്യക്തമാക്കിയിരുന്നു. പഞ്ചാബ് കിങ്‌സ് ഇലവന്‍ ക്യാപ്റ്റന്‍ കെ എല്‍ രാഹുലിനെയും അഹ്മദാബാദ് ടീം നോട്ടമിട്ടിട്ടുണ്ട്. താരം പഞ്ചാബ് ടീം വിടുമെന്ന് നേരത്തെ റിപ്പോര്‍ട്ടുണ്ടായിരുന്നു. പുതിയ ടീമിന്റെ ക്യാപ്റ്റനാക്കാനാണ് തീരുമാനം. കൂടാതെ ഇംഗ്ലണ്ട് താരം ജോസ് ബട്‌ലര്‍, ഇന്ത്യയുടെ രവിചന്ദ്ര അശ്വിന്‍ എന്നിവരെയും എന്ത് വിലകൊടുത്തും ടീമിലെത്തിക്കാനാണ് പുതിയ ടീമിന്റെ തീരുമാനം.