ഫ്രഞ്ച് ലീഗ്: എംബാപ്പെക്കും കവാനിക്കും ഹാട്രിക്; നെയ്മറിനു ഡബിള്‍
37, 45, 80 മിനിറ്റുകളിലാണ് എംബാപ്പെയുടെ ഗോളുകള്‍
പാരിസ്: ഫ്രഞ്ച് ലീഗ് കപ്പിലെ തോല്‍വിക്ക് ഗ്വിന്‍ഗാമ്പിനെ ഗോള്‍മഴയില്‍ മുക്കി പിഎസ്ജിയുടെ മധുര പ്രതികാരം. ഫ്രഞ്ച് ലീഗില്‍ നടന്ന മല്‍സരത്തിലാണ് അവസാന സ്ഥാനത്തുള്ള ഗ്വിന്‍ഗാമ്പിനെ 9-0ത്തിന് തോല്‍പ്പിച്ചത്. കിലിയന്‍ എംബാപ്പെ, എഡിസണ്‍ കവാനി എന്നിവര്‍ ഹാട്രിക്കോടെയും നെയ്മര്‍ ഇരട്ടഗോളോടെയുമാണ് ഗുയിന്‍ഗാംമ്പിന്റെ കഥ കഴിച്ചത്. 37, 45, 80 മിനിറ്റുകളിലാണ് എംബാപ്പെയുടെ ഗോളുകള്‍. 59,66,75 മിനിറ്റുകളിലാണ് കവാനി വല കുലുക്കിയത്.11, 68 മിനിറ്റുകളിലാണ് നെയമറുടെ ഗോള്‍ നേട്ടം. മെയുനിര്‍(83) അവശേഷിച്ച ഗോള്‍ നേടി. ഫ്രഞ്ച് കപ്പില്‍ തുടര്‍ച്ചയായ ആറാം ലീഗ് കപ്പ് ട്രോഫി ലക്ഷ്യമിട്ട് ക്വാര്‍ട്ടറില്‍ ഇറങ്ങിയ പിഎസ്ജിയെ ഗ്വിന്‍ഗാമ്പ് 2-1നായിരുന്നു കഴിഞ്ഞ ആഴ്ച തോല്‍പ്പിച്ചത്. സീസണില്‍ 43 വിജയം എന്ന അപരാജിത കുതിപ്പിനായിരുന്നു ഗ്വിന്‍ഗാമ്പ് അന്ന് തടയിട്ടത്. ഗ്വിന്‍ഗാമ്പിനോടുള്ള പ്രതികാരം ഒമ്പത് ഗോളിലൂടെ പിഎസ്ജി തീര്‍ക്കുകയായിരുന്നു.