കൊല്‍ക്കത്ത: ലോകക്രിക്കറ്റിലെ മിന്നും താരങ്ങള്‍ ഇനി ഒരു കുടക്കീഴില്‍. തീപ്പാറും പോരാട്ടങ്ങള്‍. ആരാധകര്‍ ആകാംക്ഷയോടെ കാത്തിരിക്കുന്ന ക്രിക്കറ്റ് പൂരത്തിന് നാളെ കൊടിയേറും. ലോകത്തിലെ ഒന്നാം നമ്പര്‍ ക്യാഷ് റിച്ച് ലീഗായ ഇന്ത്യന്‍ പ്രീമിയര്‍ ലീഗിന്റെ 18ാം സീസണിന് നാളെ തുടക്കമാവും.കിരീടത്തിനായി 10 ടീമുകള്‍ 13 വേദികളിലായി കൊമ്പുകോര്‍ക്കുന്ന രണ്ട് മാസക്കാലമാണ് വരാനാരിക്കുന്നത്. ഉദ്ഘാടന മത്സരത്തില്‍ നിലിവിലെ ചാംപ്യന്മാരായ കൊല്‍ക്കത്ത നൈറ്റ് റൈഡേഴ്‌സ്, റോയല്‍ ചലഞ്ചേഴ്‌സ് ബെംഗളൂരുവിനെ നേരിടും.വൈകിട്ട് 7.30ന് കൊല്‍ക്കത്ത ഈഡന്‍ ഗാര്‍ഡനിലാണ് മത്സരം. ടിവിയില്‍ സ്റ്റാര്‍ സ്‌പോര്‍ട്‌സ് നെറ്റ്വര്‍ക്കിലും ലൈവ് സ്ട്രീമിംഗില്‍ ജിയോഹോട്സ്റ്റാറിലും മത്സരം തത്സമയം കാണാനാകും.
അതേസമയം ഐപിഎല്‍ ആവേശം കെടുത്തുന്ന വാര്‍ത്തയാണ് കൊല്‍ക്കത്തയില്‍ നിന്ന് വരുന്നത്. നാളെ ഇടിയോട് കൂടിയ മഴ പെയ്യാനുള്ള സാധ്യതയുണ്ടെന്നാണ് കാലവസ്ഥാ പ്രവചനം. കാലവസ്ഥാ വകുപ്പ് സംസ്ഥാനത്തിന്റെ പല ഭാഗങ്ങളിലും ഓറഞ്ച് മുന്നറിയിപ്പും നല്‍കിയിട്ടുണ്ട്.അടിമുടി മാറിയാണ് ടീമുകള്‍ ഐപിഎല്ലിലെ പതിനെട്ടാം സീസണ് ഒരുങ്ങുന്നത്. ഡല്‍ഹി ക്യാപിറ്റല്‍സ്,കൊല്‍ക്കത്ത, ലക്‌നൗ, പഞ്ചാബ് കിംഗ്‌സ്, ആര്‍സിബി ടീമുകള്‍ക്ക് പുതിയ ക്യാപ്റ്റന്‍മാര്‍ വന്നു. ഹൈദരാബാദിന്റെ പാറ്റ് കമ്മിന്‍സ് മാത്രമാണ് ഈ സീസണിലെ ഏക വിദേശ ക്യാപ്റ്റന്‍.
ഇത്തവണ 13 വേദികളിലും ഉദ്ഘാടന ചടങ്ങുകള്‍ നടത്താനാണ് ബിസിസിഐ തീരുമാനം. ബോളിവുഡ് താരങ്ങളടക്കം ഉദ്ഘാടന പരിപാടികളില്‍ അണിനിരക്കും. ആറാം കിരീടം നേടി മുംബൈയും ചെന്നൈയും ചരിത്രം കുറിക്കാന്‍ കാത്തിരിക്കുമ്പോള്‍. രാജസ്ഥാനായി സഞ്ജു സാംസണ്‍ കിരീടം ചൂടുന്നത് സ്വപ്നം കാണുകയാണ് മലയാളികള്‍.
അതേസമയം, കന്നി കിരീടം മോഹിച്ച് ആര്‍സബി, പഞ്ചാബ് കിംഗ്‌സ്, ഡല്‍ഹി ക്യാപിറ്റല്‍സ്, ലക്‌നൗ സൂപ്പര്‍ ജയന്റ്‌സ് ടീമുകളുമുണ്ട്. ആദ്യ സീസണില്‍ കിരീടവുമായി ഞെട്ടിച്ചത് ആവര്‍ത്തിക്കാനായിരിക്കും ഗുജറാത്ത് ടൈറ്റന്‍സിന്റെ ശ്രമം. മെയ് 25ന് ഈഡന്‍ ഗാര്‍ഡനിലാണ് കലാശപ്പോരാട്ടം.
