ജിദ്ദ: ദുരന്ത മുഖത്തെ രക്ഷാപ്രവര്‍ത്തനത്തിലൂടെ ശ്രദ്ധേയനായ ഈശ്വര്‍ മാല്‍പെയെ ജിദ്ദ കേരള പൗരാവലി ആദരിക്കും. ഈശ്വര്‍ മാല്‍പെയെ ആദരിക്കുന്നതോടൊപ്പം അര്‍ജുനുവേണ്ടി മനാഫ് നടത്തിയ സേവനങ്ങളും ത്യാഗങ്ങളും അനുസ്മരിക്കും. കേരളത്തിലെ കവളപ്പാറ, ചൂരല്‍ മല പാതാര്‍, താനൂര്‍ തൂവല്‍തീരം തുടങ്ങിയ ദുരന്ത മേഖലകളില്‍ വിവധ തരത്തിലുള്ള രക്ഷാ പ്രവര്‍ത്തനങ്ങള്‍ക്ക് നേതൃത്വം നല്‍കിയ സാമൂഹിക സംഘടനകളെ ആദരിക്കുകയും ആവശ്യമെങ്കില്‍ രക്ഷാ പ്രവര്‍ത്തങ്ങള്‍ക്ക് ആവശ്യമായ സാമഗ്രികള്‍ വാങ്ങി നല്‍കുകയും ചെയ്യും. അബീര്‍ മെഡിക്കല്‍ ഗ്രൂപ്പിന്റെ സഹകരണത്തോടെ ജിദ്ദയില്‍ ആരോഗ്യ ബോധവല്‍ക്കരണ ക്യാംപ് സംഘടിപ്പിക്കും. പ്രവാസി സാമൂഹിക പ്രവര്‍ത്തകര്‍ക്കും ആരോഗ്യ ഇന്‍ഷുറന്‍സ് നിലവിലില്ലാത്തവര്‍ക്കും പ്രത്യേക പ്രിവിലേജ് കാര്‍ഡുകള്‍ വിതരണം ചെയ്യും. ജിദ്ദ കേരള പൗരാവലി പ്രവര്‍ത്തക സമിതി യോഗത്തില്‍ ചെയര്‍മാന്‍ കബീര്‍ കൊണ്ടോട്ടി അധ്യക്ഷത വഹിച്ചു. ജനറല്‍ കണ്‍വീനര്‍ മന്‍സൂര്‍ വയനാട്, അബ്ദുല്‍ ഖാദര്‍ ആലുവ, ആക്ടിങ് ഖജാഞ്ചി വേണുഗോപാല്‍ അന്തിക്കാട് സംസാരിച്ചു.