ഹജ്ജ് തീര്‍ത്ഥാടകര്‍ക്ക് നേരിട്ട് വിമാനം: ഇസ്രായേലും സൗദിയും ചര്‍ച്ച നടത്തി
അടുത്ത മാസം യുഎസ് പ്രസിഡന്റ് ജോ ബൈഡന്റെ ഈ മേഖല സന്ദര്‍ശനത്തോട് അനുബന്ധിച്ച് കൂടുതല്‍ അറബ് രാജ്യങ്ങള്‍ ഇസ്രായേലുമായുള്ള ബന്ധം സാധാരണ നിലയിലാക്കാനുള്ള നടപടികള്‍ സ്വീകരിക്കാന്‍ തയ്യാറാണെന്ന് കഴിഞ്ഞയാഴ്ച ഒരു മുതിര്‍ന്ന യുഎസ് ഉദ്യോഗസ്ഥന്‍ യുഎസ് ജനപ്രതിനിധികളെ അറിയിച്ചതിന് പിന്നാലെയാണ് ഇതു സംബന്ധിച്ച റിപോര്‍ട്ട് പുറത്തുവന്നത്.
ജറൂസലം: ഇസ്രായേല്‍ പൗരത്വമുള്ള ഫലസ്തീനികളെ ഹജ്ജ്, ഉംറ തീര്‍ഥാടനങ്ങള്‍ക്കായി നേരിട്ട് സൗദി അറേബ്യയിലേക്ക് പറക്കാന്‍ അനുവദിക്കുന്ന കരാറില്‍ ഇസ്രായേലും സൗദി അറേബ്യയും ചര്‍ച്ചകള്‍ നടത്തുകയാണെന്ന് പേര് വെളിപ്പെടുത്താത്ത ഉറവിടങ്ങളെ ഉദ്ധരിച്ച് ഫിനാന്‍ഷ്യല്‍ ടൈംസ് റിപ്പോര്‍ട്ട് ചെയ്തു.
അടുത്ത മാസം യുഎസ് പ്രസിഡന്റ് ജോ ബൈഡന്റെ ഈ മേഖല സന്ദര്‍ശനത്തോട് അനുബന്ധിച്ച് കൂടുതല്‍ അറബ് രാജ്യങ്ങള്‍ ഇസ്രായേലുമായുള്ള ബന്ധം സാധാരണ നിലയിലാക്കാനുള്ള നടപടികള്‍ സ്വീകരിക്കാന്‍ തയ്യാറാണെന്ന് കഴിഞ്ഞയാഴ്ച ഒരു മുതിര്‍ന്ന യുഎസ് ഉദ്യോഗസ്ഥന്‍ യുഎസ് ജനപ്രതിനിധികളെ അറിയിച്ചതിന് പിന്നാലെയാണ് ഇതു സംബന്ധിച്ച റിപോര്‍ട്ട് പുറത്തുവന്നത്.
ചെങ്കടല്‍ ദ്വീപുകളായ തിരാന്‍, സനാഫിര്‍ എന്നിവയുടെ നിയന്ത്രണം ഈജിപ്തില്‍ നിന്ന് സൗദി അറേബ്യയിലേക്ക് മാറ്റുന്നതിന് ഇസ്രായേല്‍, ഈജിപ്ത്, സൗദി അറേബ്യ എന്നിവിടങ്ങളില്‍ യുഎസ് ഇടനിലക്കാരനാകുമെന്നാണ് കരുതുന്നത്. ഇതിന് ഇസ്രായേല്‍ ഇക്കാര്യം അംഗീകരിക്കേണ്ടതുണ്ട്.
പകരമായി, സൗദി അറേബ്യ ഇസ്രായേല്‍ വിമാനക്കമ്പനികള്‍ക്ക് തങ്ങളുടെ വ്യോമാതിര്‍ത്തിയിലൂടെ പറക്കാന്‍ അനുവദിക്കും. നിലവില്‍, യുണൈറ്റഡ് അറബ് എമിറേറ്റ്‌സ്, ബഹ്‌റൈന്‍ എന്നിവിടങ്ങളിലേക്കുള്ള ഇസ്രായേലി വിമാനങ്ങള്‍ക്ക് മാത്രമേ രാജ്യത്തിന് മുകളിലൂടെ പറക്കാന്‍ കഴിയൂ, അതുപോലെ തന്നെ എയര്‍ ഇന്ത്യ വിമാനങ്ങള്‍ക്കും ഇസ്രായേലിലേക്കും പുറത്തേക്കും പറക്കാന്‍ കഴിയും.