നടിയോട് മോശമായി പെരുമാറിയെന്ന പരാതി; രഞ്ജിത്തിനെതിരേ കുറ്റപത്രം സമര്‍പ്പിച്ചു
എറണാകുളം: ബംഗാളി സിനിമാ നടിയോട് മോശമായി പെരുമാറിയെന്ന കേസില്‍ സംവിധായകന്‍ രഞ്ജിത്തിനെതിരെ പൊലീസ് കുറ്റപത്രം സമര്‍പ്പിച്ചു. എറണാകുളം അഡീഷണല്‍ ചീഫ് ജുഡീഷ്യല്‍ മജിസ്‌ട്രേറ്റ് കോടതിയിലാണ് കുറ്റപത്രം സമര്‍പ്പിച്ചത്. ഹേമ കമ്മിറ്റി റിപ്പോര്‍ട്ട് പുറത്ത് വന്നതിന് പിന്നാലെയായിരുന്നു സംവിധായകന്‍ രഞ്ജിത്തിനെതിരെ ലൈംഗികാതിക്രമ ആരോപണവുമായി ബംഗാളി നടി പൊലീസില്‍ പരാതി നല്‍കിയത്. 2009ല്‍ പാലേരി മാണിക്യം എന്ന സിനിമയില്‍ അവസരം വാഗ്ദാനം ചെയ്ത് തന്നെ വിളിച്ചുവരുത്തി മോശമായി പെരുമാറിയെന്നാണ് നടിയുടെ പരാതി.