തോട്ടട ബോംബേറ് കേസില്‍ ഒരാള്‍ കൂടി കസ്റ്റഡിയില്‍;പ്രതികള്‍ക്ക് വടിവാളെത്തിച്ചത് അരുണ്‍
സനദിന് വടിവാളെത്തിച്ചത് അരുണ്‍ ആണെന്നാണ് കണ്ടെത്തല്‍. ഇയാളുടെ അറസ്റ്റ് ഇന്ന് രേഖപ്പെടുത്തും
കണ്ണൂര്‍: തോട്ടടയില്‍ വിവാഹാഘോഷത്തിനിടെയുണ്ടായ ബോംബേറില്‍ ഒരാള്‍ കൂടി കസ്റ്റഡിയില്‍. കടമ്പൂര്‍ സ്വദേശി അരുണിനെയാണ് കസ്റ്റഡിയിലെടുത്തത്. സനദിന് വടിവാളെത്തിച്ചത് അരുണ്‍ ആണെന്നാണ് കണ്ടെത്തല്‍. ഇയാളുടെ അറസ്റ്റ് ഇന്ന് രേഖപ്പെടുത്തും. ഇതോടെ കേസില്‍ അറസ്റ്റിലാവുന്നവരുടെ എണ്ണം അഞ്ചാകും.
കഴിഞ്ഞ ദിവസം മൂന്ന് പേര്‍ അറസ്റ്റിലായിരുന്നു. ഏച്ചൂര്‍ സ്വദേശികളായ മിഥുന്‍, ഗോകുല്‍, കടമ്പൂര്‍ സ്വദേശി സനദ് എന്നിവരെയാണ് അറസ്റ്റ് ചെയ്തിരുന്നത്. ബോംബ് നിര്‍മ്മിച്ചത് താനാണെന്ന് ചോദ്യം ചെയ്യലില്‍ മിഥുന്‍ സമ്മതിച്ചു. മറ്റ് പ്രതികളായ അക്ഷയ്, ഗോകുല്‍ എന്നിവര്‍ ബോംബ് നിര്‍മ്മിക്കാന്‍ സഹായിച്ചെന്നും മിഥുന്‍ മൊഴി നല്‍കി. ഇന്നലെയാണ് കേസിലെ പ്രധാനപ്രതിയായ മിഥുന്‍ എടക്കാട് സ്‌റ്റേഷനില്‍ കീഴടങ്ങിയത്.പ്രതികള്‍ സഞ്ചരിച്ച വാഹനം കസ്റ്റഡിയിലെടുത്തിട്ടുണ്ട്. വെള്ള ട്രാവലര്‍ വാഹനമാണ് കസ്റ്റഡിയിലെടുത്തത്. കൊലപാതകം നടന്ന ദിവസം പ്രതികള്‍ സംഭവ സ്ഥലത്തേക്ക് എത്തിയതും ഇവിടെ നിന്ന് രക്ഷപ്പെട്ടതും ഈ വാഹനത്തിലാണെന്നാണ് പോലിസിന്റെ നിഗമനം. ബോംബ് എത്തിച്ചതും ഈ വാഹനത്തിലാണ്.