തുടര്‍ച്ചയായി യോഗങ്ങളില്‍ പങ്കെടുത്തില്ല; കാലിക്കറ്റ് സര്‍വകലാശാലയില്‍ ലീഗിന്റെ സെനറ്റ് അംഗത്വം നഷ്ടമായി
കോഴിക്കോട്: തുടര്‍ച്ചയായി യോഗങ്ങളില്‍ പങ്കെടുക്കാത്തതിനെത്തുടര്‍ന്ന് കാലിക്കറ്റ് സര്‍വകലാശാലയില്‍ മുസ്‌ലിം ലീഗിന്റെ സെനറ്റ് അംഗത്വം നഷ്ടമായി. പി അബ്ദുല്‍ ഹമീദ് എംഎല്‍എയുടെ സെനറ്റ് അംഗത്വം റദ്ദാക്കിയതായി കാലിക്കറ്റ് സര്‍വകലാശാല അറിയിച്ചു. സെനറ്റിലെ ഏക ലീഗ് പ്രതിനിധിയാണ് അബ്ദുല്‍ ഹമീദ്.
1975ലെ സര്‍വകലാശാല നിയമത്തിലെ 44 (4) വകുപ്പനുസരിച്ചാണ് രജിസ്ട്രാര്‍ ഡോ. ഇ കെ സതീഷ് എംഎല്‍എയ്‌ക്കെതിരേ നടപടി സ്വീകരിച്ചത്. 2019 ഡിസംബര്‍ 10 മുതല്‍ തുടര്‍ച്ചയായ ആറ് സെനറ്റ് യോഗങ്ങളില്‍ പങ്കെടുത്തിട്ടില്ലെന്ന് എംഎല്‍എയ്ക്ക് രജിസ്ട്രാര്‍ അയച്ച കത്തില്‍ പറയുന്നു. സര്‍വകലാശാല സ്ഥിതിചെയ്യുന്ന വള്ളിക്കുന്ന് മണ്ഡലത്തിലെ എംഎല്‍എയാണ് പി അബ്ദുല്‍ ഹമീദ്. തുടര്‍ച്ചയായി മൂന്ന് യോഗങ്ങളില്‍ പങ്കെടുക്കാത്ത അംഗങ്ങളുടെ സെനറ്റ് അംഗത്വം ചട്ടപ്രകാരം റദ്ദാവുമെന്നതിനാലാണ് കത്ത് നല്‍കിയത്.
