കൊവിഡ് 19 രോഗപ്രതിരോധം: ഐസോലേഷന്‍ സൗകര്യമൊരുക്കി

മാള: കൊവിഡ് 19 രോഗത്തിനെതിരേയുള്ള പ്രതിരോധ പ്രവര്‍ത്തനങ്ങളുടെ ഭാഗമായി മാള കെ കരുണാകരന്‍ സ്മാരക സാമൂഹികാരോഗ്യ കേന്ദ്രത്തില്‍ ഐസോലേഷന്‍ സൗകര്യം ഒരുക്കി. മാള ബ്ലോക്ക് പഞ്ചായത്തിന് കീഴിലുള്ള സി എച്ച് സിയിലെ പേ വാര്‍ഡ് കെട്ടിടത്തിലാണ് രോഗികളെ ഐസോലേഷനില്‍ പാര്‍പ്പിക്കുന്നതിന് വേണ്ടി നാലുമുറികള്‍ അണുവിമുക്തമാക്കി സജ്ജീകരിച്ചിട്ടുള്ളത്. ബ്ലോക്ക് പഞ്ചായത്ത് പ്രസിഡന്റ് ഇ കേശവന്‍കുട്ടി, വൈസ് പ്രസിഡന്റ് ബിജി വിത്സണ്‍, മാള ബ്ലോക്ക് പഞ്ചായത്ത് സെക്രട്ടറി സി രമ്യ, ആശുപത്രി സൂപ്രണ്ട് ഡോ. ആഷാ സേവ്യര്‍ എന്നിവരുടെ നേതൃത്വത്തിലാണ് ഐസോലേഷന്‍ മുറികള്‍ സജ്ജീകരിച്ചത്. മേലധികാരികളുടെ നിര്‍ദേശമനുസരിച്ച് കൊവിഡ് 19 രോഗികള്‍ക്ക് 24 മണിക്കൂറും ചികില്‍സ ഉറപ്പുവരുത്താനുള്ള എല്ലാ തയ്യാറെടുപ്പുകളും നടത്തിയിട്ടുണ്ടെന്ന് ബ്ലോക്ക് പഞ്ചായത്ത് പ്രസിഡന്റ് അറിയിച്ചു.