ഖത്തറില്‍ വാഹനാപകടം; കണ്ണൂര്‍ മട്ടന്നൂര്‍ സ്വദേശി ഉള്‍പ്പെടെ രണ്ടുപേര്‍ മരിച്ചു

ദോഹ: ഖത്തറില്‍ വാഹനാപകടത്തില്‍ കണ്ണൂര്‍ മട്ടന്നൂര്‍ സ്വദേശി ഉള്‍പ്പെടെ രണ്ടുപേര്‍ മരിച്ചു. ഇന്നലെ വൈകുന്നേരമുണ്ടായ അപകടത്തില്‍ മട്ടന്നൂര്‍ ചോലയില്‍ രഹനാസാണ് മരിച്ചത്. 40 വയസായിരുന്നു. ഒപ്പമുണ്ടായിരുന്ന നേപ്പാള്‍ സ്വദേശിയും അപകടത്തില്‍ മരിച്ചു. ഗുരുതര പരിക്ക് പറ്റിയ മറ്റൊരാളെ ആശുപത്രിയില്‍ പ്രവേശിപ്പിച്ചു. ഇയാളും നേപ്പാള്‍ സ്വദേശിയാണ്. ഖത്തറിലെ സ്വകാര്യ കമ്പനിയില്‍ ജോലി ചെയ്യുകയാണ് മൂന്ന് പേരും. സാധനങ്ങള്‍ ഡെലിവറിക്കായി പോകുന്നതിനിടെ ഇവര്‍ സഞ്ചരിച്ച വാഹനം നിര്‍ത്തിയിട്ട ട്രെയിലറിന് പിന്നില്‍ ഇടിക്കുകയായിരുന്നു.

വരട്ടിയോടന്‍ അബ്ദുല്‍ വഹിദിന്റെയും ചോലയില്‍ ഖദീജയുടെയും മകനാണ് മരണപ്പെട്ട രഹ്നാസ്. ഭാര്യ ശരീഫ. മക്കള്‍ : മിന്സ ഫാത്തിമ, സൈനുല്‍ ഹാഫിസ്, സാഖിഫ് ഐമന്‍ ഹമദ്. മോര്‍ച്ചറിയില്‍ സൂക്ഷിച്ച മൃതദേഹം നടപടികള്‍ പൂര്‍ത്തിയാക്കിയ ശേഷം നാട്ടിലെത്തിക്കും.