മുസ്ലിംകള്‍ക്ക് ദോഷമുള്ള ഒന്നും ചന്ദ്രബാബു നായിഡു ചെയ്യില്ല; ടിഡിപി നേതാവ് നവാബ് ജാന്‍

ഹൈദരാബാദ്: മുസ്ലിംകളെ ദോഷമായി ബാധിക്കുന്ന ഒരു ബില്ലും കൊണ്ടുവരാന്‍ ചന്ദ്രബാബു നായിഡു സമ്മതിക്കില്ലെന്ന് ടിഡിപി നേതാവ് നവാബ് ജാന്‍. വഖഫ് ബില്‍ അവതരിപ്പിക്കുന്നത് തടയാന്‍ എല്ലാവരും ഒരുമിച്ച് നില്‍ക്കണമെന്നും നവാബ് ജാന്‍ പറഞ്ഞു.ജംഇയ്യത്തുല്‍ ഉലമായെ ഹിന്ദ് സംഘടിപ്പിച്ച ഭരണഘടനാ സംരക്ഷണ സമ്മേളനത്തില്‍ സംസാരിക്കവെയാണ് അദ്ദേഹം ഇക്കാര്യം പറഞ്ഞത്. ചന്ദ്രബാബു നായിഡുവിന് രണ്ട് കണ്ണുകളുണ്ട്. അതില്‍ ഒന്ന് ഹിന്ദുക്കള്‍ക്ക് വേണ്ടിയും രണ്ടാമത്തേത് മുസ്ലിംകള്‍ക്ക് വേണ്ടിയുമാണ്. ഏതെങ്കിലും ഒരു കണ്ണിന് പ്രശ്നമുണ്ടായാല്‍ അത് മൊത്തം ശരീരത്തെ ബാധിക്കും. വികസനത്തിന്റെ പാതയിലൂടെയാണ് ചന്ദ്രബാബു നായിഡു സര്‍ക്കാര്‍ മുന്നോട്ട് പോകുന്നതെന്നും അദ്ദേഹം പറഞ്ഞു.

മതേതര മനസ്സുള്ളയാളാണ് ചന്ദ്രബാബു നായിഡുവെന്നും ഒരിക്കലും മുസ്ലിംകളെ ബാധിക്കുന്ന ബില്ലുകള്‍ അവതരിപ്പിക്കാന്‍ അദ്ദേഹം സമ്മതിക്കില്ലെന്നും നവാബ് ജാന്‍ പറഞ്ഞു.സ്വാതന്ത്ര്യത്തിന് ശേഷം ചന്ദ്രബാബു നായിഡുവിന്റെ ഭരണത്തിലാണ് മുസ്ലിംകള്‍ക്ക് അഭൂതപൂര്‍വമായ വളര്‍ച്ചയുണ്ടായതെന്നും നവാബ് ജാന്‍ അവകാശപ്പെട്ടു.