കൂടത്തായി: മൂന്നാമത്തെ കുറ്റപത്രം ഈയാഴ്ച സമര്‍പ്പിക്കും

കോഴിക്കോട്: കൂടത്തായി കൊലപാതക കേസിലെ മൂന്നാമത്തെ കുറ്റപത്രം ഈ ആഴ്ച സമര്‍പ്പിക്കും. ആല്‍ഫൈന്‍ കൊലപാതകത്തിലെ കുറ്റപത്രമാണ് സമര്‍പ്പിക്കുക. ഷാജുവിനെ വിവാഹം കഴിക്കുന്നതിന്റെ മുന്നൊരുക്കമായാണ് ആല്‍ഫൈനെ ജോളി കൊലപ്പെടുത്തിയത്. ബ്രഡ്ഡില്‍ സയനൈഡ് നല്‍കിയാണ് ആല്‍ഫൈനെ ജോളി കൊലപ്പെടുത്തിയതെന്നാണ് കുറ്റപത്രം.

2014 മെയ് ഒന്നിനാണ് ജോളിയുടെ നിലവിലെ ഭര്‍ത്താവ് ഷാജുവിന്റേയും സിലിയുടേയും മകളായ ആല്‍ഫൈന്‍ കൊല്ലപ്പെടുന്നത്. ആല്‍ഫൈനെ തികച്ചും ആസൂത്രിതമായാണ് ജോളി കൊലപ്പെടുത്തിയത്. സയനൈഡ് ചെറിയ ഡപ്പിയിലാക്കി ബ്രഡ്ഡില്‍ പുരട്ടി ആല്‍ഫൈന് നല്‍കാനായി എടുത്തുവച്ചു. ഇതൊന്നുമറിയാതെ ഷാജുവിന്റെ സഹോദരി ആന്‍സി ബ്രഡ് നല്‍കുകയും ചെയ്‌തെന്നാണ് കുറ്റപത്രത്തില്‍ പറയുന്നത്. ഷാജുവിനെ വിവാഹം കഴിക്കുന്നതിന്റെ മുന്നൊരുക്കമായാണ് ആല്‍ഫൈനെ കൊലപ്പെടുത്തിയത്.

കൊലപാതകത്തില്‍ ഒന്നാം പ്രതി ജോളിയും സുഹൃത്ത് എം എസ് മാത്യു രണ്ടാം പ്രതിയും സയനൈഡ് എത്തിച്ചു നല്‍കിയ സ്വര്‍ണ്ണപ്പണിക്കാരന്‍ പ്രജുകുമാര്‍ മൂന്നാം പ്രതിയുമാണ്. പ്രധാന സാക്ഷികളായ സിലിയുടെ ബന്ധുക്കളും ആല്‍ഫൈനെ ചികില്‍സിച്ച ബന്ധുക്കളും ഉള്‍പ്പെടെ 110 സാക്ഷികളാണ് കേസിലുള്ളത്. 65 തെളിവുകളും കുറ്റപത്രത്തോടൊപ്പം സമര്‍പ്പിക്കും. സി എ ഷാജു ജോസഫിന്റെ നേതൃത്വത്തിലാണ് താമരശേരി ഫസ്റ്റ്ക്ലാസ് മജിസ്‌ട്രേറ്റ് കോടതിയിലാണ് കുറ്റപത്രം സമര്‍പ്പിക്കുക.