യുപിയിലെ ബഡഗാവില്‍ മുസ് ലിംപള്ളിയിലെയും ക്ഷേത്രത്തിലെയും ഉച്ചഭാഷണികള്‍ നീക്കം ചെയ്തു

വരാണസി: യുപിയിലെ ബഡഗാവില്‍ മുസ് ലിംപള്ളിയിലെയും ക്ഷേത്രത്തിലെയും ഉച്ചഭാഷണികള്‍ സ്വമേധയാ നീക്കം ചെയ്തു. ക്ഷേത്രഭാരവാഹികളുടെയും പളളി ഇമാമിന്റെയും യോഗത്തിലാണ് ഇതുസംബന്ധിച്ച തീരുമാനമെടുത്തത്.

ക്ഷേത്രപുരോഹിതന്‍ ശാന്തി മോഹന്‍ ദാസ്, പള്ളി ഇമാം ഹാഫിസ് മുഹമ്മദ് താജ് അലം എന്നിവര്‍ ചേര്‍ന്നാണ് സുപ്രധാനമായ ഈ തീരുമാനമെടുത്തത്. സമുദായ സൗഹാര്‍ദ്ദത്തിന് സന്ദേശമെന്ന നിലയിലാണ് തീരുമാനമെന്ന് ഇരുവരും പറഞ്ഞു.

ബഡഗോണിലെ രാം ജാനകി ക്ഷേത്രം സംസ്ഥാനത്തെ പ്രമുഖ ക്ഷേത്രമങ്ങളിലൊന്നാണ്. ബഡഗോണ്‍ സുന്നി ജമാഅത്ത് പള്ളിയും പ്രമുഖമാണ്. കാലങ്ങളായി ഈ ക്ഷേത്രത്തില്‍ ലൗഡ് സ്പീക്കറിലൂടെ ഭക്തിഗാനങ്ങള്‍ കേള്‍പ്പിക്കാറുണ്ട്. പള്ളിയില്‍ ബാങ്ക് വിളിക്കുകയും ചെയ്യാറുണ്ട്.

ജനങ്ങള്‍ക്കുള്ളില്‍ സൗഹാര്‍ദ്ദം വളര്‍ത്തുന്നതിനാണ് ഈ നടപടിയെന്ന് ശാന്തി മോഹന്‍ ദാസ് പറഞ്ഞു.

മുസ് ലിം പള്ളികളില്‍ ബാങ്ക് കൊടുക്കാന്‍ ലൗഡ് സ്പീക്കര്‍ ഉപയോഗിക്കുന്നതിനെതിരേ ഹിന്ദുത്വരുടെ നേതൃത്വത്തില്‍ വലിയ കലാപമാണ് രാജ്യത്താസകലം നടക്കുന്നത്. മുസ് ലിം സമൂഹം അതിനെ പ്രതിരോധിക്കുന്നതിനിടയിലാണ് ഈ സംഭവം.