പാരിസ് ഒളിംപിക്‌സിന് ബ്രസീല്‍ ഇല്ല; കാനറികളെ വീഴ്ത്തി അര്‍ജന്റീനന്‍ യുവനിര ഒളിമ്പിക്‌സിന്

സാവോപോളോ: ബ്രസീലിനെ തോല്‍പ്പിച്ച് അര്‍ജന്റീന ഒളിമ്പിക് യോഗ്യത ഉറപ്പിച്ചു . ഇന്ന് പുലര്‍ച്ചെ നടന്ന യോഗ്യതാ മത്സരത്തില്‍ മറുപടിയില്ലാത്ത ഒരു ഗോളിന് ജയിച്ചാണ് അര്‍ജന്റീന ഒളിമ്പിക്‌സിലേക്ക് യോഗ്യത നേടിയത്. പരാജയത്തോടെ ബ്രസീലിന്റെ ഒളിമ്പിക് യോഗ്യത നഷ്ടമായി.

ഹാവിയര്‍ മഷറാനോ പരിശീലിപ്പിക്കുന്ന ടീം മത്സരം അവസാനിക്കാന്‍ 13 മിനിറ്റ് ബാക്കി നില്‍ക്കെ ആണ് വിജയ ഗോള്‍ നേടിയത്. ലൂസിയാനോ ഗോണ്ടൗ നേടിയ ഗോളില്‍ ആണ് അര്‍ജന്റീന 1-0ന്റെ വിജയം നേടിയത്. വാലന്റൈന്‍ ബാര്‍കോയുടെ ക്രോസ് ഹെഡ് ചെയ്തായിരുന്നു ഗോണ്ടൗവുടെ ഗോള്‍. അര്‍ജന്റീനയും പരാഗ്വേയും ആണ് ലാറ്റിനമേരിക്കയില്‍ നിന്ന് ഒളിമ്പിക്സിനായി യോഗ്യത നേടിയത്.