കേരള പോലിസിന്റെ സോഷ്യല്‍മീഡിയ പ്ലാറ്റ്‌ഫോമില്‍ ഇനി അടിതട പഠിക്കാം

തിരുവനന്തപുരം: സ്ത്രീകള്‍ക്കെതിരെയുളള അതിക്രമങ്ങള്‍ തടയുന്നതിനായി കേരള പോലിസ് ആവിഷ്‌ക്കരിച്ച സ്വയം പ്രതിരോധ പരിശീലന പരിപാടി ഇനി സോഷ്യല്‍ മീഡയയിലൂടെ പഠിക്കാം. സ്ത്രീകള്‍ക്ക് ഒറ്റപ്പെട്ട അവസ്ഥയില്‍ അതിക്രമം നേരിടേണ്ടി വന്നാല്‍ എങ്ങനെ പ്രതികരിക്കാം എന്നതിനെക്കുറിച്ച് കേരളാ പോലിസ് സോഷ്യല്‍ മീഡിയ സെല്‍ തയ്യാറാക്കിയ അടിതട എന്ന സ്വയംപ്രതിരോധ പാഠങ്ങള്‍ ഉള്‍ക്കൊളളിച്ചുകൊണ്ടുളള ട്യൂട്ടോറിയല്‍ വീഡിയോ വ്യാഴാഴ്ച കേരള പോലിസിന്റെ ഔദ്യോഗിക സോഷ്യല്‍ മീഡിയ പ്ലാറ്റ്‌ഫോമുകളില്‍ റിലീസ് ചെയ്യും.

പെണ്‍കുട്ടികള്‍ക്കും സ്ത്രീകള്‍ക്കും ഏറെ പ്രയോജനപ്പെടുന്ന ഈ പദ്ധതി കേരള പോലിസ് സോഷ്യല്‍ മീഡിയ സെല്‍ നോഡല്‍ ഓഫിസര്‍ കൂടിയായ എ.ഡി.ജി.പി മനോജ് എബ്രഹാമിന്റെ നേതൃത്വത്തിലാണ് തയ്യാറാക്കിയിരിക്കുന്നത്.

സ്ത്രീകള്‍ക്കെതിരെയുളള അതിക്രമങ്ങള്‍ വര്‍ദ്ധിച്ചുവരുന്ന സാഹചര്യത്തില്‍ അത്തരം അതിക്രമങ്ങള്‍ തടയുന്നതിനായി കേരള പോലിസ് നിരവധി പദ്ധതികള്‍ ആവിഷ്‌ക്കരിച്ചിട്ടുണ്ട്. സ്വയം പ്രതിരോധശേഷി കൈവരിക്കുന്നതിനായി പോലിസ് വനിതാ സ്വയംപ്രതിരോധ സംഘത്തിന്റെ നേതൃത്വത്തില്‍ സ്വയം പ്രതിരോധ പരിശീലനം കഴിഞ്ഞ നിരവധി വര്‍ഷങ്ങളായി എല്ലാ ജില്ലകളിലും സൗജന്യമായി നല്‍കി വരുന്നു.

സോഷ്യല്‍മീഡിയ സെല്ലിലെ പോലിസ് ഉദ്യോഗസ്ഥന്‍ അരുണ്‍.ബി.റ്റിയുടേതാണ് ട്യൂട്ടോറിയല്‍ വീഡിയോയുടെ ആശയം. തിരുവനന്തപുരം സിറ്റിയിലെ വനിതാ സ്വയംപ്രതിരോധ സംഘത്തിലെ അംഗങ്ങളായ ജയമേരി, സുല്‍ഫത്ത്, അനീസ്ബാന്‍, അതുല്യ എന്നിവരാണ് വീഡിയോയിലൂടെ പരിശീലനം നല്‍കുന്നത്. സന്തോഷ് സരസ്വതി ക്യാമറയും നിധീഷ് എഡിറ്റിംഗും നിര്‍വ്വഹിച്ചിരിക്കുന്നു.