സൂര്യാഘാതം : രണ്ടിടത്ത് ജോലി നിര്‍ത്താന്‍ നിര്‍ദേശം

തിരുവനന്തപുരം: നഗരത്തിലെ വിവിധ കെട്ടിടനിര്‍മാണ സ്ഥലങ്ങളില്‍ തൊഴില്‍ വകുപ്പ് നടത്തിയ പരിശോധനയില്‍ തൊഴിലാളികളെ കൊണ്ട് അനധികൃതമായി ജോലി ചെയ്യിക്കുന്നതായി കണ്ടെത്തി. സൂര്യാഘാത സാധ്യത കണക്കിലെടുത്ത് പകല്‍ 12മുതല്‍ 3വരെ ജോലി ചെയ്യിപ്പിക്കുന്നത് തൊഴില്‍ വകുപ്പ് നിരോധിച്ചിരുന്നു. ഇത് ലംഘിച്ച രണ്ടു സൈറ്റുകളിലെ ജോലി നിര്‍ത്തിവയ്ക്കാന്‍ ബന്ധപ്പെട്ടവര്‍ക്ക് നിര്‍ദേശം നല്‍കി. വരും ദിവസങ്ങളിലും പരിശോധന തുടരുമെന്ന് അധികൃതര്‍ അറിയിച്ചു. ജില്ലാ ലേബര്‍ ഓഫിസര്‍ ബി എസ് രാജീവ്, അസിസ്റ്റന്റ് ലേബര്‍ ഓഫിസര്‍മാരായ എന്‍ കൃഷ്ണകുമാര്‍, ബാബു, സത്യരാജ് , എസ് വിജയകുമാര്‍ എന്നിവരാണ് സ്‌ക്വാഡില്‍ ഉണ്ടായിരുന്നത്.